സംസ്ഥാനത്ത് കനത്തമഴ ; മഴക്കെടുതിയിൽ പൊലിഞ്ഞത് 6 ജീവനുകൾ

സംസ്ഥാനത്ത് മഴക്കെടുതിയിൽ 6 മരണം. തിരുവല്ലയിലും വയനാട്ടിലുമായ് ഷോക്കേറ്റ് രണ്ടു പേർ മരിച്ചു. വൈദ്യുതി കമ്പിയിൽ നിന്നും ഷോക്കേറ്റാണ് മരിച്ചത്, തിരുവല്ലയിൽ മേപ്രാൽ  സ്വദേശി റെജിയാണ് പുല്ലരിയാൻ പോയപ്പോൾ ഷോക്കേറ്റ് മരിച്ചത്. വയനാട്ടിൽ ഷോക്കേറ്റ് മരിച്ചത് ചീയമ്പം നഗറിൽ സുധൻ.

കണ്ണൂരിൽ മഴക്കെടുതിയിൽ ഇന്ന് രണ്ട് മരണം. മട്ടന്നൂരിലും ചൊക്ലിയിലും വെളളക്കെട്ടിൽ വീണാണ് രണ്ട് മരണവും സംഭവിച്ചത്. മട്ടന്നൂർ കോളാരിയിലെ കുഞ്ഞാമിനയാണ് (51) വീടിന് സമീപത്തെ വയലിലെ വെളളക്കെട്ടിൽ വീണ് മരിച്ചത്.

ചൊക്ലി ഒളവിലത്ത് റോഡരികിലെ വെളളക്കെട്ടിലാണ് പെയിന്‍റിങ് തൊഴിലാളിയായ ചന്ദ്രശേഖരന്‍റെ (63) മൃതദേഹം രാവിലെ കണ്ടത് . പാലക്കാട് കോട്ടേക്കാട് കനത്ത മഴയില്‍ വീട് ഇടിഞ്ഞുവീണ് അമ്മയ്ക്കും മകനും ദാരുണാന്ത്യം സംഭവിച്ചു. വീട്ടിനുള്ളില്‍ കിടന്നുറങ്ങുകയായിരുന്നവരാണ് മരിച്ചത്.

കോട്ടേക്കാട് കോടക്കുന്ന് വീട്ടിൽ പരേതനായ ശിവന്റെ ഭാര്യ സുലോചന, മകൻ രഞ്ജിത് എന്നിവരാണ് മരിച്ചത്. ഫയർഫോഴ്‌സ് സ്ഥലത്തെത്തി മൃതദേഹം ആലത്തൂർ ആശുപത്രിയിലേക്ക് മാറ്റി.