ഡോ.രേഖ നായർ ആർ.സി.സി. ഡയറക്ടർ

സ്വന്തം ലേഖകൻ

തിരുവനന്തപുരം: റീജിണൽ ക്യാൻസർ സെന്ററിലെ ഡോ. രേഖ നായരെ ആർ.സി.സി ഡയറക്ടർ പദവിയിലേക്ക് നിയമിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചർ അറിയിച്ചു. ആർ.സി.സിയിലെ പത്തോളജി വിഭാഗം അഡീഷണൽ പ്രൊഫസറും ദേശീയ രക്താർബുദ രോഗനിർണയ വിദഗ്ധയുമാണ് ഡോ.രേഖ നായർ . ആഗസ്റ്റ് 10-ാം തീയതി കൊച്ചിൻ ക്യാൻസർ സെന്ററിൽ വച്ച് നടന്ന അഭിമുഖത്തിൽ ഡൽഹി നാഷണൽ ക്യാൻസർ ഇൻസ്റ്റിറ്റ്യൂട്ട് ഡയറക്ടർ ഡോ. ജി.കെ. രഥ്, മുംബയ് ടാറ്റാ മെമ്മോറിയൽ ഹോസ്പിറ്റൽ ഡയറക്ടർ ഡോ. രാജൻബദ്ദ്വ, കൊൽക്കത്ത ടാറ്റാ മെമ്മോറിയൽ ക്യാൻസർ സെന്റർ ഡയറക്ടർ ഡോ. മാമൻചാണ്ടി, കൊച്ചിൻ ക്യാൻസർ സെന്റർ ഡയറക്ടർ ഡോ. മോനി കുര്യാക്കോസ് എന്നിവരടങ്ങിയ സെർച്ച് കമ്മിറ്റിയാണ് ഡോ. രേഖ നായരെ ഡയറക്ടറായി നാമനിർദ്ദേശം ചെയ്തത്.

ഇതിനാണ് സർക്കാർ അംഗീകാരം നൽകിയത്. ആർ.സി.സി.യിലെ നാലാമത്തെ ഡയറക്ടറും ആദ്യത്തെ വനിതാ ഡയറക്ടറും കൂടിയാണ് ഡോ. രേഖാ നായർ. തിരുവനന്തപുരം മെഡിക്കൽ കോളേജിൽ നിന്ന് 1984ൽ എം.ബി.ബി.എസിലും 1990ൽ പത്തോളജി എം.ഡി.യിലും ഉന്നത വിജയം നേടിയിരുന്നു. അമേരിക്കയിലെ നാഷണൽ ക്യാൻസർ ഇൻസ്റ്റിറ്റ്യൂട്ടിൽ നിന്നും ഇംഗ്ലണ്ടിലെ ലീഡ്സ് സർവകലാശാലയിൽ നിന്നും രക്താർബുദ നിർണയത്തിൽ ഡോ. രേഖ നായർ പരിശീലനം നേടിയിട്ടുണ്ട്. 1989ൽ സർവീസിൽ പ്രവേശിച്ച ഇവർക്ക് അദ്ധ്യാപനത്തിലും റിസർച്ചിലും ക്ലിനിക്കൽ വിഭാഗത്തിലുമായി 30 വർഷത്തെ സേവന പരിചയമുണ്ട്. ആർ.സി.സി.യിലെ അഡ്വാൻസ്ഡ് സ്പെഷ്യാലിറ്റി ലാബുകളായ മോളിക്യുലർ ഫ്ളോസൈറ്റോമെട്രി, ഫിഷ്ലാബ്, ഇമ്മ്യൂണോ ഹിസ്റ്റോ കെമിസ്ട്രിലാബ് തുടങ്ങിയവ ഡോ. രേഖ നായരുടെ മേൽനോട്ടത്തിലാണ് ആരംഭിച്ചത്.

ദേശീയ അന്തർദേശീയ തലങ്ങളിലുള്ള ജേണലുകളിൽ അമ്പതിൽപരം മെഡിക്കൽ ലേഖനങ്ങൾ പ്രസിദ്ധീകരിച്ചിട്ടുണ്ട്. ദേശീയ അന്തർദേശീയ സെമിനാറുകളിൽ പ്രബന്ധം അവതരിപ്പിക്കുന്ന സ്ഥിരം ക്ഷണിതാവു കൂടിയാണ് ഡോ. രേഖ നായർ. രക്താർബുദ നിർണയത്തിലും സ്തനാർബുദ നിർണയത്തിലും പുതിയ വെളിച്ചം പകർന്ന മൈക്രോ ആർ.എൻ.എ.യുടെ കണ്ടുപിടിത്തത്തിന് 2016ൽ ദേശീയ അന്തർദേശീയ പേറ്റന്റ് ലഭിച്ചിട്ടുണ്ട്. ഇപ്പോൾ ഐ.സി.എം. ആറിന്റെ തക്താർബുദ നിർണയ ടാസ്‌ക് ഫോഴ്സ് അംഗം കൂടിയാണ് ഡോ. രേഖാ നായർ.