കോഴിക്കോട്: എം.ഡി.എം.എയുമായി ആലപ്പുഴ നൂറനാട് സ്വദേശി അമ്പാടി എസ്. (22) കോഴിക്കോട് പോലീസിന്റെ പിടിയിലായി. കോഴിക്കോട് പാളയം ചിന്താവളപ്പിന് സമീപം വെച്ചാണ് വിൽപ്പനയ്ക്കായി കൊണ്ടുവന്ന 38.3 ഗ്രാം എം.ഡി.എം.എയുമായി ഇയാളെ പിടികൂടിയത്.
കോഴിക്കോട് സിറ്റി പോലീസ് മേധാവി ടി. നാരായണന്റെ കീഴിലുള്ള ഡാൻസാഫ് സംഘവും കസബ എസ്.ഐ. ആർ. ജന്മോഹൻ ദത്തിന്റെ നേതൃത്വത്തിലുള്ള പോലീസ് സംഘവും ചേർന്നാണ് ലഹരിവേട്ട നടത്തിയത്. ലഹരിക്കെതിരായ പോലീസ്- ഡാൻസാഫ് സംയുക്ത പരിശോധനയിലാണ് യുവാവിനെ എം.ഡി.എം.എയുമായി പിടികൂടിയത്.
ബെംഗളൂരുവിൽ നിന്നാണ് കോഴിക്കോട് കേന്ദ്രീകരിച്ച് വിൽപ്പനയ്ക്കായി എം.ഡി.എം.എ. കൊണ്ടുവന്നത്. പിടികൂടിയ മയക്കുമരുന്നിന് വിപണിയിൽ രണ്ട് ലക്ഷം രൂപ വിലവരും.
Whatsapp Group 1 | Whatsapp Group 2 |Telegram Group
സിറ്റി പോലീസ് മേധാവിയുടെ നിർദേശപ്രകാരം കോഴിക്കോട് സിറ്റി നാർക്കോടിക്ക് സെൽ അസിസ്റ്റന്റ് കമ്മിഷണർ വി. സുരേഷിന്റെ നേതൃത്വത്തിലാണ് നഗരത്തിലെ വിവിധയിടങ്ങളിൽ പരിശോധന നടത്തുന്നത്. വാഹനങ്ങൾ, സ്കൂൾ- കോളേജ് പരിസരങ്ങൾ, പൊതുസ്ഥലങ്ങൾ എന്നിവിടങ്ങളിലെല്ലാം വ്യാപകമായ പരിശോധയും നിരീക്ഷണവുമാണ് പോലീസ് നടത്തുന്നത്.
