യുവാക്കളിൽ കരൾ ​രോ​ഗങ്ങൾ കൂടുന്നതായി റിപ്പോർട്ട്; കരൾ സംബന്ധമായ രോ​ഗങ്ങൾ മൂലം 23-35 വയസ് പ്രായമുള്ള യുവാക്കളിൽ മരണനിരക്ക് ഉയരുന്നു, കരുതലോടെ ജീവിക്കാം

പണ്ട് പ്രായമായവരിലാണ് രോ​ഗങ്ങൾ കൂടുതലായി കണ്ടിരുന്നതെങ്കിൽ ഇന്ന് ഏറ്റവും കൂടുതൽ ശരീരിക ബുദ്ധിമുട്ടുകൾ അനുഭവിക്കുന്നവർ യുവാക്കളാണ്. 23-35 വയസ് പ്രായമുള്ള യുവാക്കളിൽ കരൾ സംബന്ധമായ പ്രശ്നങ്ങൾ വർദ്ധിച്ചുവരികയാണെന്ന് പഠനങ്ങൾ സൂചിപ്പിക്കുന്നു.

മദ്യപാനം മൂലമുണ്ടാകുന്ന കരൾ രോഗം, ഫാറ്റി ലിവർ, ഹെപ്പറ്റൈറ്റിസ്, സിറോസിസ് തുടങ്ങിയ വിവിധ അവസ്ഥകൾ കരളിനെ തകരാറിലാക്കുന്നു. ഇത് യുവാക്കളിൽ ഉയർന്ന മരണനിരക്കിലേക്കും നയിക്കുന്നതായി വിദ​ഗ്ധർ പറയുന്നു. നിലവിൽ, കരൾ സംബന്ധമായ പ്രശ്നങ്ങൾ അനുഭവിക്കുന്നതിൽ ഗണ്യമായ വർദ്ധനവ് ഉണ്ടായിട്ടുണ്ട്.

മദ്യപാനം, പുകവലി, ആവശ്യത്തിന് വെള്ളം കുടിക്കാതിരിക്കുക, അമിതമായ സോഡിയം, വൈറൽ അണുബാധ, ചില മരുന്നുകളെ നിരന്തരമുള്ള ഉപയോ​ഗം എന്നിവയാണ് കരളിനെ ദോഷകരമായി ബാധിക്കുന്ന വിവിധ ഘടകങ്ങൾ.

ടൈപ്പ് 2 പ്രമേഹം, പൊണ്ണത്തടി, ഉയർന്ന കൊളസ്‌ട്രോളിൻ്റെ അളവ് തുടങ്ങിയ അവസ്ഥകൾ കരൾ സംബന്ധമായ പ്രശ്നങ്ങൾ ഉണ്ടാകാനുള്ള സാധ്യത കൂട്ടുന്നു. ഫാറ്റി ലിവർ, നോൺ-ആൽക്കഹോളിക് ഫാറ്റി ലിവർ തുടങ്ങിയ കരൾ രോഗങ്ങൾ യുവാക്കളിൽ ഗണ്യമായി വർദ്ധിക്കുന്നതായി ഗ്ലെനീഗിൾസ് ഹോസ്പിറ്റൽസ് പരേലിലെ സീനിയർ കൺസൾട്ടൻ്റ് ഹെപ്പറ്റോളജിസ്റ്റ് ഡോ. ഉദയ് സംഗ്ലോദ്കർ പറഞ്ഞു.

അനാരോഗ്യകരമായ ജീവിതശൈലികളും അമിതമായ മദ്യപാനവുമെല്ലാമാണ് കരൾ രോ​ഗം പിടിപെടുന്നതിന് ഇടയാക്കുന്നത്. കരളിനെ തകരാറിലാക്കുകയും ടിഷ്യൂകളിൽ സ്ഥിരമായ പാടുകൾ ഉണ്ടാക്കുകയും ചെയ്യുന്ന ഗുരുതരമായ അവസ്ഥയാണ് സിറോസിസ്.

സാധാരണ കരൾ അമിതമായി കൊഴുപ്പ് ശേഖരിക്കാൻ തുടങ്ങുന്നു. ഇത് കാലക്രമേണ കരൾ ടിഷ്യുവിൻ്റെ വീക്കത്തിനും പാടുകൾക്കും കാരണമാകുന്നു. കരൾ രോ​ഗം നേരത്തെ തിരിച്ചറിയുന്നത് ആളുകളുടെ ജീവൻ രക്ഷിക്കാൻ സഹായിക്കും.

യുവാക്കൾക്കിടയിൽ കരൾ രോഗം വർദ്ധിക്കുന്നത് മദ്യപാനം മൂലമാണ്. ഫാറ്റി ലിവർ ഡിസീസ്, ആൽക്കഹോൾ ഹെപ്പറ്റൈറ്റിസ് തുടങ്ങിയ അവസ്ഥകൾ ക്ഷണിച്ചു വരുത്തുന്നു. സംസ്കരിച്ച ഭക്ഷണങ്ങളും പഞ്ചസാരയും കൂടുതലുള്ള മോശം ഭക്ഷണവുമാണ് കരൾ രോ​ഗം പിടിപെടുന്നതിന് ഇടയാക്കുന്നതെന്ന് അപ്പോളോ സ്പെക്ട്ര മുംബൈയിലെ ജനറലും എച്ച്പിബി സർജനുമായ ഡോ. പ്രകാശ് കുരാനെ പറഞ്ഞു.