കറുകച്ചാലിൽ കാറിടിച്ച്‌ ഗുരുതരമായി പരിക്കേറ്റ് ചികിത്സയിലായിരുന്നയാള്‍ മരിച്ചു; മരിച്ചത് ആനിക്കാട് സ്വദേശി

കറുകച്ചാല്‍: കാറിടിച്ച്‌ ഗുരുതരമായി പരിക്കേറ്റ് ചികിത്സയിലായിരുന്നയാള്‍ മരിച്ചു.

മല്ലപ്പള്ളി ആനിക്കാട് കൂടത്തുമുറിയില്‍ മാത്യു ഐസക്ക് (48) ആണ് മരിച്ചത്.
ചൊവ്വാഴ്ച രാത്രി 8.10-ന് ചങ്ങനാശേരി-വാഴൂർ റോഡില്‍ കറുകച്ചാല്‍ അണിയറപ്പടിക്ക് സമീപമായിരുന്നു അപകടം.

ബൈക്ക് നിർത്തിയ ശേഷം സമീപത്തെ കടയിലേക്ക് നടന്നുപോകുമ്പോള്‍ മാമ്മൂട് സ്വദേശി ഓടിച്ച കാർ മാത്യുവിനെ പിന്നില്‍നിന്ന് ഇടിച്ചു തെറിപ്പിക്കുകയായിരുന്നു.

അപകടശേഷം കാർ നിർത്താതെ പോയി. ഇയാള്‍ പിന്നീട് കറുകച്ചാല്‍ പോലീസ് സ്‌റ്റേഷനില്‍ കീഴടങ്ങി.

തലയ്ക്ക് ഗുരുതരമായി പരിക്കേറ്റ മാത്യുവിനെ കറുകച്ചാലിലെ സ്വകാര്യ ആശുപത്രിയിലും തുടർന്ന് കോട്ടയം മെഡിക്കല്‍കോളജിലും പ്രവേശിപ്പിക്കുകയായിരുന്നു. ഇന്നലെ ഉച്ചയ്ക്ക് 12.30-ഓടെയാണ് മരണം സംഭവിച്ചത്. ഭാര്യ: റീന. മക്കള്‍: ആഷർ, എയ്ഞ്ചല്‍. സംസ്‌കാരം പിന്നീട്.