ഇന്‍ഡിഗോയുടെ നടപടി പുനപരിശോധിക്കണം; ഇപിയെ പിന്തുണച്ച് സിപിഐഎം

തിരുവനന്തപുരം: എൽ.ഡി.എഫ് കണ്‍വീനറും മുതിർന്ന സി.പി.ഐ(എം) നേതാവുമായ ഇ.പി ജയരാജനെ വിലക്കാനുള്ള ഇൻഡിഗോ കമ്പനിയുടെ തീരുമാനത്തെ സി.പി.ഐ(എം) എതിർത്തു. ഇ.പി ജയരാജനെ വിലക്കാനുള്ള ഇൻഡിഗോ കമ്പനിയുടെ തീരുമാനം അപലപനീയമാണെന്ന് സി.പി.ഐ(എം) സംസ്ഥാന സെക്രട്ടേറിയറ്റ് പറഞ്ഞു.

മുഖ്യമന്ത്രിയെ ആക്രമിക്കാൻ ശ്രമിച്ച രണ്ട് യൂത്ത് കോൺഗ്രസുകാരെ ഇ.പി ജയരാജൻ തടയാൻ ശ്രമിച്ചു. അതിന് മൂന്നാഴ്ചത്തെ യാത്രാവിലക്ക് ഏർപ്പെടുത്താനുള്ള ഇൻഡിഗോയുടെ തീരുമാനം പുനഃപരിശോധിക്കണമെന്നും സിപിഐ(എം) ആവശ്യപ്പെട്ടു.

ഇൻഡിഗോ വിമാനത്തിൽ മുഖ്യമന്ത്രിക്കെതിരായ പ്രതിഷേധത്തെ നേരിട്ടത് ഇ.പി ജയരാജനായിരുന്നു. ഇതാണ് ജയരാജന്‍റെ വിമാനയാത്രാ വിലക്കിലേക്ക് നയിച്ചത്. അതേസമയം, യൂത്ത് കോൺഗ്രസ് പ്രവർത്തകരെ ഇൻഡിഗോ വിമാനത്തിൽ തള്ളിമാറ്റിയ സംഭവത്തിൽ തനിക്കെതിരെ ഏർപ്പെടുത്തിയ യാത്രാവിലക്ക് നിയമവിരുദ്ധമാണെന്ന് ജയരാജൻ പറഞ്ഞു.