തിരുവനന്തപുരം : മോഹന്ലാല്-ജീത്തു ജോസഫ് ചിത്രം ദൃശ്യം3 330 കോടി നേട്ടത്തിന്റെ തിളക്കത്തില്. ബോക്സ് ഓഫീസ് കളക്ഷന് പുറമേ ഒടിടി- സാറ്റ്ലൈറ്റ് ബിസിനസ് ഉള്പ്പെടെയാണ് ചിത്രം 330 കോടി നേടിയത്. സിനിമ തിയേറ്ററിലെത്തി വെറും 58 മണിക്കൂറുകള് കൊണ്ടാണ് 100 കോടി ക്ലബിലെത്തുന്നത്. റീലീസ് ചെയ്ത് 7 ദിവസം കൊണ്ടാണ് ചിത്രം 200 കോടിയുടെ നേട്ടം ഉണ്ടാക്കിയത്. ഇപ്പോഴിതാ 30ആം ദിവസത്തിലേക്ക് എത്തിയപ്പോഴേക്കും 330 കോടി അടിച്ചിരിക്കുകയാണ്. ഏറ്റവും കൂടുതല് ഭാഷകളിലേക്ക് റീമേക്ക് ചെയ്യപ്പെട്ട ചിത്രം കൂടിയാണ് ദൃശ്യം. നേട്ടം അറിയിച്ചു കൊണ്ടുള്ള പോസ്റ്റര് മോഹന്ലാല് ഫേസ്ബുക്കില് പോസ്റ്റ് ചെയ്തിട്ടുണ്ട്.
മോഹന്ലാലിനൊപ്പം നിര്മാതാവ് ആന്റണി പെരുമ്പാവൂരും സംവിധായകന് ജീത്തു ജോസഫുമുള്ളതാണ് പോസ്റ്റര്. അതേസമയം ദൃശ്യം 3യുടെ ആഗോള തിയേറ്ററിക്കല് റൈറ്റ്സ് ഉള്പ്പെടെ എല്ലാ അവകാശങ്ങളും സിനിമ തീയേറ്ററില് എത്തും മുന്പ് തന്നെ വിറ്റുപോയിരുന്നു. പെന് സ്റ്റുഡിയോസുമായി ചേര്ന്ന് പനോരമ സ്റ്റുഡിയോസ് ആണ് ചിത്രത്തിന്റെ അവകാശങ്ങള് സ്വന്തമാക്കിയത്. ‘ദൃശ്യം’ പരമ്പര ഹിന്ദിയില് നിര്മിച്ചത് പനോരമയാണ്. ‘ദൃശ്യം 3’-യുടെ ഒടിടി സ്ട്രീമിങ് കഴിഞ്ഞദിവസം ആമസോണ് പ്രൈം വീഡിയോ പ്രഖ്യാപിച്ചിരുന്നു. ജൂണ് 18ന് ചിത്രം ഒടിടിയിലെത്തും. മലയാളത്തിന് പുറമേ, തെലുങ്ക്, തമിഴ്, കന്നഡ ഭാഷകളിലും ചിത്രം ലഭ്യമാവും.
