മലപ്പുറം: സംസ്ഥാനത്ത് പകല്ച്ചൂട് റെക്കോർഡുകള് ഭേദിക്കുന്നതിനിടെ മലപ്പുറത്ത് കുട്ടികള്ക്ക് സൂര്യാഘാതമേറ്റു.
വളാഞ്ചേരി പൈങ്കണ്ണൂർ സ്വദേശികളായ പ്രമോദ് – ഷാനില ദമ്പതികളുടെ മൂന്നും അഞ്ചും വയസ്സുള്ള ആണ്കുട്ടികള്ക്കാണ് പൊള്ളലേറ്റത്. വീടിന് പുറത്ത് കളിച്ചുകൊണ്ടിരിക്കെയാണ് കുട്ടികള്ക്ക് സൂര്യാഘാതമേറ്റത്. ഇരുവരെയും ഉടൻ തന്നെ ചികിത്സയ്ക്ക് വിധേയമാക്കി.
വീടിന് ചേർന്നുള്ള പറമ്പില് കളിച്ചുകൊണ്ടിരിക്കെയാണ് കുട്ടികള്ക്ക് സൂര്യാഘാതമേറ്റത്. മൂന്ന് വയസ്സുകാരന്റെ കൈകള്ക്കും നെഞ്ചിനും പുറംഭാഗത്തുമാണ് പൊള്ളലേറ്റത്. അഞ്ച് വയസ്സുകാരന്റെ കൈകള്ക്കും പൊള്ളലുണ്ട്. ചൊവ്വാഴ്ച വൈകുന്നേരത്തോടെ കുട്ടികളുടെ ശരീരത്തില് ചെറിയ കുമിളകള് പ്രത്യക്ഷപ്പെട്ടിരുന്നു.
Whatsapp Group 1 | Whatsapp Group 2 |Telegram Group
ബുധനാഴ്ചയോടെ ഇവ വലുതായി വരികയും വേദന അനുഭവപ്പെടുകയും ചെയ്തതിനെ തുടർന്ന് കുട്ടികളെ ആശുപത്രിയില് പ്രവേശിപ്പിച്ചു. ചികിത്സയ്ക്ക് ശേഷം കുട്ടികളുടെ ആരോഗ്യനില നിലവില് തൃപ്തികരമാണെന്ന് ആശുപത്രി അധികൃതർ അറിയിച്ചു.
സംസ്ഥാനത്ത് ഉഷ്ണതരംഗ മുന്നറിയിപ്പും ഉയർന്ന താപനിലയും നിലനില്ക്കുന്ന സാഹചര്യത്തില് പൊതുജനങ്ങള് അതീവ ജാഗ്രത പാലിക്കണമെന്ന് ആരോഗ്യ വകുപ്പ് നിർദ്ദേശിച്ചു.
