കൊച്ചി: കേരളത്തിന്റെ കരിവീരന് തെച്ചിക്കോട്ടുകാവ് രാമചന്ദ്രന് വീണ്ടും വിലക്ക്. തെച്ചിക്കോട്ടുകാവ് രാമചന്ദ്രനെ പൊതുസ്ഥലത്ത് എഴുന്നള്ളിക്കുന്നത് വിലക്കിക്കൊണ്ടാണ് ഹൈക്കോടതി ഇടക്കാല ഉത്തരവിറക്കിയത്. 2019 ഫെബ്രുവരിയില് ഗുരുവായൂരില് ഗൃഹപ്രവേശത്തിനെത്തിച്ച കൊമ്പന് രാമചന്ദ്രന് ചടങ്ങിനിടെ പടക്കം പൊട്ടിക്കുന്ന ശബ്ദം കേട്ട് ഇടഞ്ഞോടുകയും രണ്ട് പേരെ കൊലപ്പെടുത്തുകയും ചെയ്തിരുന്നു. ഇതേ തുടര്ന്ന് രാമചന്ദ്രനെ എഴുന്നള്ളിക്കാന് വിലക്ക് വന്നു.
നിലവില് അസിസ്റ്റന്റ് ഫോറസ്റ്റ് കണ്സര്വേറ്ററുടെ റിപ്പോര്ട്ട് പ്രകാരമാണ് നടപടി. മൃഗങ്ങളോടുള്ള ക്രൂരത തടയുന്നതിനായി പ്രവര്ത്തിക്കുന്ന ഇടുക്കി കേന്ദ്രമായ സൊസൈറ്റി ആണ് കോടതിയെ സമീപിച്ചത്. 2019ല് വിലക്കിനിടയില് ഒരു മണിക്കൂര് കര്ശന വ്യവസ്ഥകളോടെ തെക്കേഗോപുര വാതില് തുറക്കാന് അനുമതി ലഭിച്ചിരുന്നു.
തെക്കേ ഗോപുര വാതില് തുറന്നിടുന്ന ചടങ്ങിനെ ജനകീയമാക്കിയത് തെച്ചിക്കോട്ടുകാവ് രാമചന്ദ്രനായിരുന്നു. ഗജലക്ഷണങ്ങളൊത്ത, തലപ്പൊക്കത്തില് ഏറെ പേര് കേട്ട ആനയാണ് തെച്ചിക്കോട്ട് കാവ് രാമചന്ദ്രന്. നിരവധി ഫാന്സ് ഗ്രൂപ്പുകളും ഈ സഹ്യപുത്രനുണ്ട്.
Whatsapp Group 1 | Whatsapp Group 2 |Telegram Group
