കുട്ടികളെ കൊണ്ട് നഗ്ന ശരീരത്തിൽ ചിത്രം വരപ്പിച്ച സംഭവം : രഹ്ന ഫാത്തിമ പൊലീസിന് മുൻപിൽ കീഴടങ്ങുമെന്ന് ഭർത്താവ് മനോജ്

സ്വന്തം ലേഖകൻ

കൊച്ചി : സ്വന്തം മക്കളെ ഉപയോഗിച്ച് നഗ്നമേനിയിൽ ചിത്രം വരപ്പിക്കുന്ന ദൃശ്യങ്ങൾ പ്രചരിപ്പിച്ച കേസിൽ രഹ്നഫാത്തിമ പൊലീസിന് മുൻപിൽ കീഴടങ്ങും. കേസിൽ തിങ്കളാഴ്ച കൊച്ചിയിലെത്തി പൊലീസിന് മുമ്പാകെ രഹന ഫാത്തിമ കീഴടങ്ങുമെന്ന് ഭർത്താവ് മനോജാണ് അറിയിച്ചത്.

ഡൽഹിയിൽ നിന്നും ഇന്ന് വൈകിട്ട് രഹ്ന കൊച്ചിയിലേക്ക് പുറപ്പെടുമെന്നാണ് പുറത്തുവരുന്ന റിപ്പോർട്ടുകൾ. അതേസമയം കേസിൽ രഹ്ന ഫാത്തിമയുടെ മുൻകൂർ ജാമ്യഹർജി സുപ്രീം കോടതി തളളി. കുട്ടികളെ ഉപയോഗിച്ചുള്ള രഹ്ന ഫാത്തിമയുടെ പ്രവൃത്തി കുട്ടികളെ ഉപയോഗിച്ചുളള ലൈംഗിക കുറ്റകൃത്യത്തിന്റെ പരിധിയിൽ വരും എന്ന് സുപ്രീം കോടതി നിരീക്ഷിച്ചിരുന്നു.

ഇതേ തുടർന്നാണ് കേസിൽ രഹ്ന ഫാത്തിമ സമർപ്പിച്ച ഹർജി സുപ്രീം കോടതി തളളിയത്. പ്രായപൂർത്തിയാവാത്ത കുട്ടിയെക്കൊണ്ട് തന്റെ അർദ്ധനഗ്‌ന ശരീരത്തിൽ ചിത്രം വരപ്പിച്ച് ദൃശ്യങ്ങൾ പ്രചരിപ്പിച്ച സംഭവത്തിലാണ് രഹ്നക്കെതിരെ പൊലീസ് കേസെടുത്തിരിക്കുന്നത്

സംഭവത്തിൽ പോക്‌സോ നിയമപ്രകാരവും ഐ ടി ആക്ട് പ്രകാരവുമാണ് പൊലീസ് കേസ് എടുത്തിരിക്കുന്നത്. ഇതിന് പുറമെ സംഭവത്തിൽ ബാലാവകാശകമ്മീഷനും കേസെടുത്തിരുന്നു.

സ്ത്രീശരീരത്തെക്കുറിച്ചുളള കപട സദാചാര ബോധത്തെയും ലൈംഗികതയെ കുറിച്ചുളള മിഥ്യാധാരണകൾക്കുമെതിരെ എന്ന മുഖവുരയോടെയാണ് രഹ്ന വീഡിയോ പുറത്തുവിട്ടത്. ബോഡി ആർട്‌സ് ആൻഡ് പൊളിറ്റിക്‌സ് എന്ന തലക്കെട്ടോടെയാണ് വീഡിയോ പുറത്തുവിട്ടത്.