ഇടുക്കി ചിന്നക്കനാല് സൂര്യനെല്ലിയില് കാട്ടാന ആക്രമണത്തില് സ്ത്രീ കൊല്ലപ്പെട്ടതില് പ്രതിഷേധവുമായി നാട്ടുകാര്. 36കാരിയായ മാരിയാണ് ഇന്ന് രാവിലെ കൊല്ലപ്പെട്ടത്. മകനെ സ്കൂളില് വിടാന് പോകുമ്പോഴാണ് കാട്ടാന ആക്രമിച്ചത്. കുട്ടിക്കും പരുക്കേറ്റു. മൃതദേഹം പോസ്റ്റ്മോര്ട്ടം നടപടികള്ക്കായി കൊണ്ടുപോകുന്നത് നാട്ടുകാര് തടഞ്ഞു. വനംവകുപ്പാണ് മരണത്തിന് ഉത്തരവാദികള് എന്ന് നാട്ടുകാര് ആരോപിക്കുന്നു. ആനയുണ്ടെന്ന് അറിയിക്കേണ്ട കടമ ആര്ക്കായിരുന്നു. ഇന്ന് രാവിലെ തന്നെ വിളിച്ചു. തന്റെ പെങ്ങളെ ആക്രമിച്ചു എന്ന് പറഞ്ഞു. പെങ്ങള്ക്ക് ഭര്ത്താവുമില്ല. രണ്ട് കൊച്ചുങ്ങളെ ആര് നോക്കും. തീരുമാനമുണ്ടാകാതെ ബോഡി കൊണ്ട് പോകാന് സമ്മതിക്കില്ല എന്നും കൊല്ലപ്പെട്ട സ്ത്രീയുടെ സഹോദരന് പറഞ്ഞു.
ഒരു ആനയാണ് ചത്തതെങ്കില് ഡിഎഫ്ഒ അല്ല ലോകത്തുള്ള ആള്ക്കാര് മുഴുവന് ഇവിടെ വന്നേനെ. തീരുമാനമില്ലാതെ ബോഡി ഇവിടെ നിന്ന് കൊണ്ടുപോകാന് അനുവദിക്കില്ലെന്നും നാട്ടുകാര് പറഞ്ഞു. ഇന്ന് രാവിലെ മകനെ സ്കൂളില് വിടാന് പോകുമ്പോഴായിരുന്നു കാട്ടാന ആക്രമണം ഉണ്ടായത്. മകനും ആക്രമണത്തില് സാരമായി പരുക്കേറ്റു. അഞ്ചാം ക്ലാസ് വിദ്യാര്ഥിയായ ദക്ഷനാണ് പരുക്കേറ്റത്. രണ്ട് യുവതികള്ക്കും പരുക്കേറ്റിട്ടുണ്ട്. പരുക്കേറ്റവരെ വനംവകുപ്പ് എത്തിയാണ് ആശുപത്രിയിലേക്ക് മാറ്റിയത്.
