അന്താരാഷ്ട്ര വിപണിയിൽ അസംസ്‌കൃത എണ്ണ വില കുത്തനെ ഉയർന്നു; രൂപയുടെ മൂല്യത്തിൽ ഇടിവ്

സ്വന്തം ലേഖകൻ

റിയാദ് : അന്താരാഷ്ട്ര വിപണിയിൽ അസംസ്‌കൃത എണ്ണ വില കുത്തനെ ഉയർന്നു. ഇതിനെത്തുടർന്ന് രൂപയുടെ മൂല്യത്തിൽ ഇടിവ്. ഇന്ന് വ്യാപാരം ആരംഭിച്ചപ്പോൾ തന്നെ രൂപയുടെ മൂല്യത്തിൽ ഇടിവ് രേഖപ്പെടുത്തുകയായിരുന്നു.

ഡോളറിനെതിരെ രൂപയുടെ മൂല്യം 4 പൈസ ഇടിഞ്ഞ് 71.12 എന്ന നിലയിലെത്തി. തെക്ക് പടിഞ്ഞാറൻ ലിബിയയിലെ ചില എണ്ണപ്പാടങ്ങൾ അടച്ചുപൂട്ടാൻ തുടങ്ങിയതോടെ ക്രൂഡ് ഓയിൽ വില ഒരു ശതമാനത്തിലധികം ഉയർന്നു.

ഖലീഫ ഹഫ്താറിനോട് വിശ്വസ്തരായ സൈന്യം പൈപ്പ് ലൈൻ അടച്ചതോടെയാണ് എണ്ണപ്പാടങ്ങളുടെ പ്രവർത്തനം നിർത്തിവെക്കാൻ തുടങ്ങിയത്. ഇതോടെ ഉത്പാദനം കുറയുകയും ചെയ്തു. ഏതാനും ദിവസങ്ങൾക്ക് മുമ്ബ് ഇറാൻ-അമേരിക്ക പ്രതിസന്ധിയെ തുടർന്ന് എണ്ണവിലയും സ്വർണവിലയും അന്താരാഷ്ട്രവിപണിയിൽ കുത്തനെ ഉയർന്നിരുന്നു