കാഴ്ച വൈകല്യമുള്ള വിദ്യാർത്ഥിനിയെ പീഡിപ്പിച്ച സംഭവം ; അധ്യാപകന് അറുപത് വർഷം കഠിനതടവ്

സ്വന്തം ലേഖിക

കോഴിക്കോട്: കാഴ്ച വൈകല്യമുള്ള വിദ്യാർത്ഥിനിയെ പീഡിപ്പിച്ച കേസിൽ അധ്യാപകന് അറുപത് വർഷം കഠിനതടവിന് ശിക്ഷ വിധിച്ചു. കോഴിക്കോട് പോക്സോ കോടതിയുടേതാണ് വിധി. സർക്കാർ ഒരു മാസത്തിനുള്ളിൽ വിദ്യാർത്ഥിനിക്ക് രണ്ടുലക്ഷം രൂപ നഷ്ടപരിഹാരം നൽകണമെന്നും കോടതി വിധിച്ചു.

75% കാഴ്ചാവൈകല്യമുള്ള ആറാം ക്ലാസ് വിദ്യാർത്ഥിനിയെ 2016 മുതൽ 2017 വരെയുള്ള കാലത്താണ് സ്‌കൂളിൽ വെച്ച് അധ്യാപകൻ പീഡിപ്പിച്ചത്. മറ്റു വിദ്യാർത്ഥികളാണ് ഇക്കാര്യം സ്‌കൂൾ അധികൃതരുടെ മുന്നിലെത്തിക്കുന്നത്.

ആദ്യം സ്‌കൂൾ തലത്തിൽ അന്വേഷണം നടത്തി. പിന്നീട് 2017 മാർച്ചിൽ പ്രധാനാധ്യാപകൻ പൊലീസിന് പരാതി നൽകുകയും കേസെടുക്കുകയുമായിരുന്നു.അധ്യാപകരും സഹപാഠികളും സാക്ഷികളായ കേസിൽ കടുത്ത ശിക്ഷയാണ് കോടതി വിധിച്ചിരിക്കുന്നത്.