മൊബൈലിൽ അശ്ലീല വീഡിയോ കണ്ട് അനുകരിച്ച് 10 വയസുകാരിക്ക് നേർ പീഡനം, പീഡിപ്പിച്ചത് പത്തും, പതിനൊന്നും വയസുള്ള അഞ്ച് ആൺകുട്ടികൾ

കോഴിക്കോട്: പഠന ആവശ്യത്തിനായി ഉപയോ​ഗിക്കേണ്ട മൊബൈൽ ഫോൺ ദുരുപയോ​ഗിച്ച് പത്ത് വയസുകാരിയുടെ പീഡനത്തിൽ വരെ എത്തിയ ഞെട്ടലിലാണ് കോഴിക്കോട് വെള്ളയിലെ പോലീസുകാർ. കുറ്റാരോപിതർ പത്തും, പതിനൊന്നും വയസുള്ള അഞ്ച് ആൺകുട്ടികൾ. പരാതിക്കാരിയുടെ വയസാകട്ടെ പത്തും.

2 മാസം മുൻപു രക്ഷിതാക്കളില്ലാത്ത സമയത്ത് പെൺകുട്ടിയുടെ വീട്ടിൽ എത്തിയ ആൺകുട്ടികൾ ഇവളെ ഉപദ്രവിക്കുകയായിരുന്നു. വിവരം പെൺകുട്ടി വീട്ടിൽ അറിയിച്ചെങ്കിലും ബന്ധുക്കൾ പരാതി നൽകിയില്ല. മറിച്ച് പെൺകുട്ടിയുടെ ബന്ധുക്കൾ ഈ ആൺകുട്ടികളെ ഉപദ്രവിക്കുകയാണു ചെയ്തത്.

3 ദിവസം മുൻപ് വീട്ടുകാർ പരസ്പരം വഴക്കുകൂടിയപ്പോഴാണു വിഷയം വീണ്ടും ഉയർന്നുവന്നത്. നാട്ടുകാരാണു പൊലീസിൽ അറിയിച്ചത്. തുടർന്നു പെൺകുട്ടിയുടെ മാതാപിതാക്കൾ പരാതി നൽകി. പരാതിയിൽ പറഞ്ഞ 3 ആൺകുട്ടികളെ ചോദ്യം ചെയ്തപ്പോഴാണ് മറ്റു രണ്ട് പേർ കൂടി ഉൾപ്പെട്ടതായി അറിവായത്.

മൊബൈൽ ഫോണിൽ കണ്ട വിഡിയോ ദൃശ്യങ്ങളാണ് ഇത്തരത്തിൽ ചെയ്യാൻ കാരണമെന്നു കുട്ടികൾ കൗൺസലിങ്ങിൽ വെളിപ്പെടുത്തി. ആൺകുട്ടികളെ തല്ലിയതിനു പെൺകുട്ടിയുടെ ബന്ധുക്കളുടെ പേരിലും കേസെടുത്തിട്ടുണ്ട്. കുട്ടികളെ ജുവനൈൽ ബോർഡിനു മുൻപിൽ ഹാജരാക്കിയ ശേഷം രക്ഷിതാക്കൾക്കൊപ്പം വിട്ടയച്ചു.