സ്വപ്നം പൂവണിയുന്നു : മടയ്ക്കൽ തോട് ലിഫ്റ്റ് ഇറിഗേഷൻ പൂർത്തിയാകുന്നു

സ്വന്തം ലേഖകൻ

കോട്ടയം: മീനച്ചിലാറ്റിൽ നിന്നും മീനന്തറയാറ്റിലേക്ക് ജലമെത്തിക്കുന്ന മടയ്ക്കൽ തോട്ടിലെ ലിഫ്റ്റ് ഇറിഗേഷൻ പദ്ധതി പൂർത്തിയാകുന്നു. നിർമ്മാണം പൂർത്തിയായ പമ്പ്ഹൗസിൽ മോട്ടോർ സ്ഥാപിക്കുന്ന പ്രവർത്തനങ്ങൾ അവസാനഘട്ടത്തിൽ. മഴക്കാലം കഴിയുന്നതോട് കൂടി ലിഫ്റ്റ് ഇറിഗേഷൻ പദ്ധതി സർക്കാർ നാടിന് സമർപ്പിക്കും.

നിർമ്മാണ പ്രവർത്തനങ്ങൾക്ക് തറക്കല്ലിട്ടത് ജലവിഭവ വകുപ്പ് മന്ത്രി കെ. കൃഷ്ണൻകുട്ടിയായിരുന്നു. അഡ്വ.കെ അനിൽകുമാറിന്റെ നേത്യത്വത്തിലുള്ള ജനകീയ കൂട്ടായ്മയും ഇറിഗേഷൻ വകുപ്പും ചേർന്ന് മീനന്തറയാർ നവീകരിച്ചിരുന്നു.

കഴിഞ്ഞ മൂന്ന് വർഷം കൊണ്ട് മീനന്തറയാറ്റിലേക്ക് ജലമെത്തിക്കുന്ന 150 കിലോമീറ്ററോളം വാച്ചാലുകളും തോടുകളുമൊക്കെ മീനച്ചിലാർ മീനന്തറയാർ കൊടുരാർ പുനർ സംയോജന പദ്ധതിയിലൂടെ ജനകീയ കൂട്ടായ്മ നവീകരിച്ചിരുന്നു.

തോട് തന്നെ ഇല്ലാതായ പല സ്ഥലങ്ങളിലും നിരവധി വെല്ലുവിളികളെ അതിജീവിച്ച് യന്ത്രസഹായത്താൽ തോട് വെട്ടിയാണ് ജനകീയ കൂട്ടായ്മ ജലവഴികൾ വീണ്ടെടുത്തത്.

ലിഫ്റ്റ് ഇറിഗേഷൻ ആരംഭിക്കുന്നതോടെ വേനൽക്കാലത്തും മീനന്തറയാറ്റിൽ ജലമുണ്ടാവുകയും തീരങ്ങളിലെ ആയിരക്കണക്കിനേക്കർ കൃഷിക്ക് അനുകൂലമാവുകയും ചെയ്യൂന്നു. ജലവഴികളുടെ വീണ്ടെടുപ്പിലൂടെ പ്രളയരഹിത കോട്ടയത്തിന് ഏറെ മുതൽകൂട്ടായി മാറുകയാണ് ജനകീയ കൂട്ടായ്മയുടെ പ്രവർത്തനങ്ങൾ.