തിരുവനന്തപുരം: തിരഞ്ഞെടുപ്പിലെ കനത്ത തിരിച്ചടിക്ക് പിന്നാലെ നഷ്ടപ്പെട്ട പ്രതിച്ഛായ തിരിച്ചുപിടിക്കാന് സിപിഐ സംസ്ഥാന സെക്രട്ടറി ബിനോയ് വിശ്വം നടത്തുന്ന നീക്കങ്ങള് പാളുന്നു.
ആശ വര്ക്കര്മാരുടെ സമരത്തെ അധിക്ഷേപിച്ചത് തെറ്റായിപ്പോയെന്ന ബിനോയിയുടെ കുറ്റസമ്മതത്തിന് തൊട്ടുപിന്നാലെ, അദ്ദേഹത്തിന്റെ ഇരട്ടത്താപ്പ് തുറന്നുകാട്ടി ആശ ഹെല്ത്ത് വര്ക്കേഴ്സ് അസോസിയേഷന് നേതാവ് എസ്. മിനി രംഗത്തെത്തി. സമരകാലത്ത് നേരില്ക്കണ്ട് സഹായം അഭ്യര്ത്ഥിച്ചിട്ടും തിരിഞ്ഞുനോക്കാത്ത സെക്രട്ടറി ഇപ്പോള് നടത്തുന്ന പ്രസ്താവനകള് വെറും രാഷ്ട്രീയ നാടകമാണെന്നാണ് ഉയരുന്ന ആക്ഷേപം.
ആശ വര്ക്കര്മാരുടെ സമരം കൊടുമ്പിരിക്കൊണ്ടിരുന്ന സമയത്ത് പ്രശ്നപരിഹാരത്തിനായി ബിനോയ് വിശ്വത്തെ നേരില് കണ്ടിരുന്നുവെന്ന് മിനി വെളിപ്പെടുത്തി. മുഖ്യമന്ത്രിയെ കാണാന് ഒരു അവസരം ഒരുക്കണമെന്നോ സമരം ഒത്തുതീര്പ്പാക്കാന് ഇടപെടണമെന്നോ ആവശ്യപ്പെട്ടപ്പോള്, താന് നിസ്സഹായാവസ്ഥയിലാണെന്നായിരുന്നു ബിനോയിയുടെ മറുപടി. കമ്മ്യൂണിസ്റ്റ് പാര്ട്ടിയുടെ തലപ്പത്തിരിക്കുന്ന ഒരാള് തൊഴിലാളികള്ക്ക് വേണ്ടി മുഖ്യമന്ത്രിയോട് സംസാരിക്കാന് പോലും ഭയപ്പെട്ടത് എന്ത് കമ്മ്യൂണിസ്റ്റ് ശൈലിയാണെന്ന ചോദ്യം ഇപ്പോള് പാര്ട്ടിക്കുള്ളിലും സജീവമാവുകയാണ്.
തിരഞ്ഞെടുപ്പ് തോല്വിക്ക് പിന്നാലെ എല്ലാ പഴിചാരലുകളും സിപിഎമ്മിന്റെയും മുഖ്യമന്ത്രി പിണറായി വിജയന്റെയും തലയില് വെച്ചുകെട്ടി കൈകഴുകാനാണ് ബിനോയ് വിശ്വം ശ്രമിക്കുന്നത്. തൊഴിലാളി സമരങ്ങളെ അധിക്ഷേപിക്കുന്നത് കമ്മ്യൂണിസ്റ്റ് പാരമ്പര്യമല്ലെന്ന് ഇപ്പോള് പറയുന്ന ബിനോയ്, ഭരണത്തിലിരുന്നപ്പോള് എന്തുകൊണ്ട് തിരുത്താന് തയ്യാറായില്ല എന്ന ചോദ്യത്തിന് മറുപടി നല്കേണ്ടി വരും. അധികാരം ഉള്ളപ്പോള് മൗനം പാലിക്കുകയും ജനങ്ങള് തിരിച്ചടി കൊടുത്തപ്പോള് ‘തിരിച്ചറിവ്’ ഉണ്ടാവുകയും ചെയ്യുന്നത് ജനങ്ങളെ പരിഹസിക്കലാണെന്നാണ് രാഷ്ട്രീയ നിരീക്ഷകരുടെ വിലയിരുത്തല്.
സിപിഐയുടെ വമ്പന് തകര്ച്ചയുടെ ആഴം മറയ്ക്കാനാണ് ബിനോയ് വിശ്വം ഇപ്പോള് ‘തിരുത്തല്വാദി’ ചമയുന്നത്. പാര്ട്ടി അണികള്ക്കിടയില് ബിനോയിക്കെതിരെ കടുത്ത അമര്ഷം പുകയുന്നുണ്ട്. സോഷ്യല് മീഡിയയില് ബിനോയ് മാറണമെന്ന് ആവശ്യപ്പെട്ട് നിരവധി സിപിഐ പ്രവര്ത്തകര് രംഗത്തെത്തിക്കഴിഞ്ഞു. എന്നാല് ഫെയ്സ്ബുക്കില് പറഞ്ഞിട്ട് കാര്യമില്ലെന്നും പാര്ട്ടിക്കുള്ളില് തന്റെ കസേരയ്ക്ക് ഭീഷണിയില്ലെന്നുമാണ് ബിനോയിയുടെ വാദം. പക്ഷേ, മുതിര്ന്ന നേതാക്കള്ക്കിടയില് പോലും ബിനോയിയുടെ നിലപാടുകളോട് വിയോജിപ്പ് ശക്തമാണ്.
Whatsapp Group 1 | Whatsapp Group 2 |Telegram Group
തൊഴിലാളിവര്ഗ്ഗ പാര്ട്ടിയെന്ന് അവകാശപ്പെടുന്ന സിപിഐ, സാധാരണക്കാരായ ആശ വര്ക്കര്മാരെ തെരുവില് തള്ളിയപ്പോള് ബിനോയ് വിശ്വം കാഴ്ചക്കാരനായിരുന്നു. ഭരണത്തിന്റെ തണലില് സിപിഎമ്മിനെ പ്രീണിപ്പിക്കാന് തൊഴിലാളി താല്പ്പര്യങ്ങള് ബലികഴിച്ച ബിനോയിക്ക് ഇപ്പോള് തിരിച്ചടി ലഭിക്കുന്നത് കാവ്യനീതിയാണെന്ന് മിനിയുടെ പ്രതികരണം സൂചിപ്പിക്കുന്നു. പാര്ട്ടിയുടെ അടിത്തറ തകരുമ്പോഴും ഗ്രൂപ്പ് സമവാക്യങ്ങള് ഉണ്ടാക്കി കസേര ഉറപ്പിക്കാനാണ് ബിനോയ് ശ്രമിക്കുന്നതെന്ന ആരോപണം ശക്തമാണ്.
ബിനോയ് വിശ്വം മാറാതെ സിപിഐക്ക് ഇനി ഒരു തിരിച്ചുവരവ് സാധ്യമല്ലെന്ന വികാരം പാര്ട്ടി ജില്ലാ കമ്മിറ്റികളില് നിന്ന് ഉയരുന്നുണ്ട്. എല്ഡിഎഫില് സിപിഐയുടെ വിലപേശല് ശേഷി ഇല്ലാതാക്കിയത് ബിനോയിയുടെ നയങ്ങളാണെന്ന് വിമര്ശകര് ചൂണ്ടിക്കാട്ടുന്നു. പ്രതിപക്ഷ ഉപനേതാവ് സ്ഥാനം വേണമെന്ന ഇപ്പോഴത്തെ നിലപാട് പോലും തന്റെ വ്യക്തിപരമായ പ്രതിച്ഛായ വര്ദ്ധിപ്പിക്കാനാണെന്ന ആക്ഷേപവും പാര്ട്ടിക്കുള്ളിലുണ്ട്.
പിണറായി സര്ക്കാരിന്റെ വീഴ്ചകളില് പങ്കാളിയായ ശേഷം, ഇപ്പോള് ജനവികാരം എതിരായപ്പോള് മാത്രം വിമര്ശനം ഉയര്ത്തുന്ന ബിനോയിയുടെ തന്ത്രം അണികള് തിരിച്ചറിയുന്നു. സഖാക്കള്ക്കിടയില് ബിനോയിയുടെ വിശ്വാസ്യത പൂര്ണ്ണമായും തകര്ന്നിരിക്കുകയാണ്. മിനിയുടെ വെളിപ്പെടുത്തല് ബിനോയിയെ സംബന്ധിച്ച് ഏറ്റവും വലിയ രാഷ്ട്രീയ തിരിച്ചടിയാണ്.
ദേശീയ നേതൃത്വത്തിനും ബിനോയിയുടെ പ്രവര്ത്തനങ്ങളില് അതൃപ്തിയുണ്ട്. സംസ്ഥാനത്ത് പാര്ട്ടി നേരിട്ട നാണംകെട്ട പരാജയത്തിന് മറുപടി നല്കാന് ബിനോയിക്ക് കഴിയുന്നില്ല. ഇതിനിടയിലാണ് തൊഴിലാളി സംഘടനകള് തന്നെ സെക്രട്ടറിക്കെതിരെ രംഗത്തെത്തുന്നത്. വരും ദിവസങ്ങളില് സിപിഐക്കുള്ളില് വലിയൊരു പൊട്ടിത്തെറിക്കും നേതൃമാറ്റത്തിനുമുള്ള സാധ്യതകള് തെളിയുകയാണ്.
കമ്മ്യൂണിസ്റ്റ് രീതി അതല്ലെന്ന് ആവര്ത്തിക്കുന്ന ബിനോയിയോട്, തൊഴിലാളികളെ നിസ്സഹായരായി വിട്ടുകൊടുക്കുന്നതാണോ കമ്മ്യൂണിസ്റ്റ് രീതിയെന്ന് അണികള് ചോദിക്കുന്നു. അധികാരം പോയിക്കഴിയുമ്പോള് ഉണ്ടാകുന്ന ഇത്തരം വിലാപങ്ങള് ജനം പുച്ഛിച്ചു തള്ളുമെന്ന കാര്യത്തില് സംശയമില്ല. ആശ വര്ക്കര്മാര്ക്ക് നല്കിയ വാഗ്ദാനങ്ങള് പാലിക്കാത്ത പാര്ട്ടി സെക്രട്ടറി ഇനി എന്ത് ധാര്മ്മികതയുടെ പുറത്താണ് മുന്നോട്ട് പോകുക എന്നത് കണ്ടറിയണം
