കോഴിക്കോട് : അമീബിക് മസ്തിഷ്കജ്വരം ബാധിച്ച് അഞ്ചുവയസ്സുകാരി ആശുപത്രിയിൽ. മലപ്പുറം മൂന്നിയൂർ സ്വദേശിനിയായ കുട്ടിയാണ് കോഴിക്കോട് മെഡിക്കല് കോളേജ് ആശുപത്രിയിൽ തീവ്രപരിചരണ വിഭാഗത്തില് ചികിത്സയിൽ കഴിയുന്നത്.
പുഴയില് കുളിച്ചതിലൂടെയാണ് അമീബ കുട്ടിയുടെ ശരീരത്തിലെത്തിയതെന്നാണ് സംശയിക്കുന്നത്. ഈ മാസം ഒന്നിനാണ് കുട്ടി പുഴയില് കുളിച്ചത്. ഒരാഴ്ച കഴിഞ്ഞപ്പോള് പനിയും തലവേദനയും വരികയായിരുന്നു. സമാനമായ ലക്ഷണങ്ങളോടെ നാല് കുട്ടികളെ കൂടി ആശുപത്രിയില് പ്രവേശിപ്പിച്ചിട്ടുണ്ട്.
പരാദ സ്വഭാവമില്ലാതെ ജലത്തില് സ്വതന്ത്രമായി ജീവിക്കുന്ന അമീബ വിഭാഗത്തില്പ്പെടുന്ന രോഗാണുക്കള് നീർച്ചാലിലോ കുളത്തിലോ കുളിക്കുന്നതുവഴി മൂക്കിലെ നേർത്ത തൊലിയിലൂടെ മനുഷ്യന്റെ ശരീരത്തില് കടക്കുകയും തലച്ചോറിനെ ഗുരുതരമായി ബാധിക്കുന്ന മസ്തിഷ്ക ജ്വരത്തിന് കാരണമാകുകയും ചെയ്യുന്നു. പനി,തലവേദന, ഛർദി, അപസ്മാരം എന്നിവയാണ് പ്രധാന രോഗ ലക്ഷണങ്ങള്.
Whatsapp Group 1 | Whatsapp Group 2 |Telegram Group
