നാട്ടകം പോളിടെക്നിക്കിന് സമീപം കാറുകൾ കൂട്ടിയിടിച്ചു: പെൺകുട്ടികളടക്കം കുറിച്ചി സ്വദേശികളായ അഞ്ചു പേർക്ക് പരിക്ക്; അപകടം നാലുവരിപ്പാതയിൽ

എ.കെ ശ്രീകുമാർ

ചിത്രങ്ങൾ അജേഷ് കോട്ടയം 

കോട്ടയം: എംസി റോഡിൽ നാട്ടകത്ത് നാലുവരിപ്പാതയിൽ കാറുകൾ തമ്മിൽ കൂട്ടിയിടിച്ച് അഞ്ചു പേർക്ക് പരിക്കേറ്റു. നാട്ടകം പോളിടെക്നിക്ക് കോളജിന് മുന്നിലാണ് കാറുകൾ കൂട്ടിയിടിച്ചത്.

ഇടിയുടെ ആഘാതത്തിൽ രണ്ടു കാറുകളുടെ മുൻഭാഗം പൂർണമായും തകർന്നു. അപകടത്തിൽ കുറിച്ചി എസ്.പുരം പുത്തൻ പറമ്പിൽ ലാലുവിന്റെ മകൾ വന്ദന (13 ) , സഹോദരി ചന്ദന (16), ഒപ്പമുണ്ടായിരുന്ന മഞ്ഞപ്പള്ളിത്തറയിൽ അജയൻ (38) എന്നിവരെ പരിക്കുകളോടെ കോട്ടയം ജനറൽ ആശുപത്രിയിൽ പ്രവേശിപ്പിച്ചു. അപകടത്തിൽ പരിക്കേറ്റ  ലാലു (52) , ആഷ്ണ (21 )  എന്നിവരെ മെഡിക്കൽ കോളജ് ആശുപത്രിയിൽ എത്തിച്ചിട്ടുണ്ട്.

ശനിയാഴ്ച വൈകിട്ട് ഒൻപത് മണിയോടെ എംസി റോഡിൽ നാട്ടകം പോളിടെക്നിക് കോളേജിനു മുന്നിൽ ആയിരുന്നു അപകടം. കോട്ടയം ഭാരത് ആശുപത്രിയിൽ ചികിത്സയിൽ കഴിയുന്ന ബന്ധുവിനെ കാണുന്നതിനായി ആണ് കുറിച്ചി സ്വദേശികളായ സംഘം കാറിൽ എത്തിയത്. ഈ സമയം എതിർദിശയിൽ നിന്ന് വന്ന കാർ കാറുമായി കൂട്ടിയിടിക്കുകയായിരുന്നു.

രണ്ടു കാറുകളും നടുറോഡിൽ വെച്ച് കൂട്ടിയിടിച്ചതോടെ എംസി റോഡിൽ വൻ ഗതാഗത കുരുക്ക് രൂപപ്പെട്ടു. കോട്ടയത്തുനിന്ന് എത്തിയ അഗ്നിരക്ഷാസേനയും നാട്ടുകാരും ചേർന്നാണ് അപകടത്തിൽപ്പെട്ടവരെ പുറത്തെടുത്തത്. പരിക്കേറ്റവരെ 108 ആംബുലൻസിൽ ആശുപത്രിയിലെത്തിച്ചു.