നമ്മുടെ നിത്യജീവിതത്തിലെ ഒഴിച്ചുകൂടാനാവാത്ത ഒന്നാണ് പാല്. രാവിലെ എഴുന്നേറ്റാലുടന് കുടിക്കുന്ന ചായ മുതല് രാത്രി ഉറങ്ങുന്നതിന് മുമ്പുള്ള പാല് ഗ്ലാസ് വരെ നീളുന്നു പാലിനോടുള്ള നമ്മുടെ ബന്ധം. പ്രോട്ടീനും കാല്സ്യവും ധാരാളമായി അടങ്ങിയ പാല് ഒരു പൂര്ണ്ണാഹാരമായാണ് കണക്കാക്കപ്പെടുന്നത്.
എന്നാല്, വേനല്ക്കാലം കടുക്കുന്നതോടെ വീട്ടമ്മമാരെയും പാചകക്കാരെയും ഒരുപോലെ അലട്ടുന്ന പ്രധാന പ്രശ്നമാണ് പാലിന്റെ കേടുപാടുകള്. അന്തരീക്ഷ താപനില ഉയരുന്നത് പാലിനുള്ളിലെ ബാക്ടീരിയകളുടെ വളര്ച്ച വേഗത്തിലാക്കുകയും നിമിഷങ്ങള്ക്കുള്ളില് പാല് പിരിഞ്ഞുപോകാന് കാരണമാവുകയും ചെയ്യുന്നു.
കടുത്ത ചൂടില് പാല് വാങ്ങി അല്പ്പനേരം പുറത്തുവെച്ചാല് പോലും അത് പിരിഞ്ഞുപോകാന് സാധ്യതയുണ്ട്. പാലിന്റെ ഗുണമേന്മയും രുചിയും നിലനിര്ത്താന് സഹായിക്കുന്ന പ്രധാന ടിപ്പുകള് എന്തൊക്കെയാണെന്നു നോക്കാം.
Whatsapp Group 1 | Whatsapp Group 2 |Telegram Group
വാങ്ങിയ ഉടന് തിളപ്പിക്കുക – പച്ചപ്പാലോ പാക്കറ്റ് പാലോ വാങ്ങിയാലുടന് തന്നെ തിളപ്പിക്കുന്നത് ബാക്ടീരിയകളെ നശിപ്പിക്കാനും പാല് കേടാകാതിരിക്കാനും സഹായിക്കും. പാലിന്റെ ആയുസ്സ് വര്ധിപ്പിക്കാന് ഇത് അത്യാവശ്യമാണ്.
പാത്രം തിരഞ്ഞെടുക്കുമ്പോള് ശ്രദ്ധിക്കുക – പ്ലാസ്റ്റിക് പാത്രങ്ങളേക്കാള് പാലിന്റെ തണുപ്പ് നിലനിര്ത്താന് സ്റ്റെയിന്ലെസ്സ് സ്റ്റീല് അല്ലെങ്കില് ഗ്ലാസ് പാത്രങ്ങളാണ് ഉത്തമം. വായു കടക്കാത്ത വിധം ഇവ അടച്ചു സൂക്ഷിക്കണം.Dairy & Eggs
ഫ്രിഡ്ജിലെ ശരിയായ സ്ഥാനം – ഫ്രിഡ്ജിന്റെ വാതിലിലെ ഷെല്ഫുകളില് പാല് സൂക്ഷിക്കുന്നത് ഒഴിവാക്കുക. വാതില് ഇടയ്ക്കിടെ തുറക്കുമ്പോള് അവിടെ താപനിലയില് മാറ്റമുണ്ടാകും. പകരം ഫ്രിഡ്ജിനുള്ളിലെ ഏറ്റവും തണുപ്പുള്ള ഉള്ഭാഗത്തെ ഷെല്ഫുകളില് പാല് വയ്ക്കുക.
ചൂടാറിയ ശേഷം മാത്രം ഫ്രിഡ്ജിലേക്ക് – തിളപ്പിച്ച പാല് നന്നായി തണുത്തതിന് ശേഷം മാത്രം ഫ്രിഡ്ജില് വെക്കുക. ചൂടോടെ വെക്കുന്നത് ഫ്രിഡ്ജിനുള്ളിലെ താപനില ഉയര്ത്തുകയും മറ്റ് ഭക്ഷണങ്ങള് കൂടി കേടാകാന് കാരണമാവുകയും ചെയ്യും.
ഗന്ധങ്ങളെ അകറ്റി നിര്ത്തുക- പാലിലെ കൊഴുപ്പിന് ചുറ്റുമുള്ള ഗന്ധങ്ങളെ വേഗത്തില് വലിച്ചെടുക്കാനുള്ള കഴിവുണ്ട്. അതിനാല് ഉള്ളി, മീന് തുടങ്ങിയ രൂക്ഷഗന്ധമുള്ള ഭക്ഷണസാധനങ്ങളുടെ അടുത്തുനിന്ന് പാല് പാത്രം മാറ്റി വയ്ക്കുക.
വൃത്തി പാലിക്കുക – പാലില് ഒരിക്കലും നനഞ്ഞ സ്പൂണ് ഇടരുത്. ഉപയോഗത്തിനായി എടുത്തു മാറ്റിയ പാല് ബാക്കി വന്നാല് അത് തിരികെ പ്രധാന പാത്രത്തിലേക്ക് ഒഴിക്കരുത്. ഇത് ബാക്ടീരിയല് അണുബാധയ്ക്ക് കാരണമാകും.
ഫ്രിഡ്ജ് ഇല്ലാത്ത സാഹചര്യത്തില് -ഫ്രിഡ്ജ് ലഭ്യമല്ലെങ്കില് പാല് നന്നായി തിളപ്പിച്ച ശേഷം തണുത്ത വെള്ളം നിറച്ച വീതിയുള്ള ഒരു പാത്രത്തില് ഇറക്കിവെക്കുക. ഇടയ്ക്കിടെ വെള്ളം മാറ്റുന്നത് പാലിന്റെ തണുപ്പ് നിലനിര്ത്താന് സഹായിക്കും.
ദീര്ഘകാലം സൂക്ഷിക്കാന് – രണ്ടോ മൂന്നോ ദിവസത്തില് കൂടുതല് പാല് സൂക്ഷിക്കേണ്ടി വന്നാല് വായു കടക്കാത്ത പാത്രത്തിലാക്കി ഫ്രീസറില് വയ്ക്കാം. പാല് തണുത്ത് കട്ടിയാകുമ്പോള് വികസിക്കുമെന്നതിനാല് പാത്രത്തില് അല്പം സ്ഥലം ബാക്കി വിടാന് ശ്രദ്ധിക്കണം.
