വടക്കൻ കുട്ടനാട്ടിലെ കർഷകരുടെ കണ്ണിരിന് ശമനമില്ല: കുമരകം, തിരുവാർപ്പ് പഞ്ചായത്തുകളിലായി കിടക്കുന്ന തട്ടാർകാട് – പാറേക്കാട് പാടശേഖരത്തിൽ കൊയ്ത്തു നടന്നിട്ട് 2 ആഴ്ചയായി: ഇതുവരെ നെല്ല് സംഭരിച്ചിട്ടില്ല.

കോട്ടയം: വടക്കൻ കുട്ടനാടൻ
കർഷകരുടെ കണ്ണിര് ഇനിയും മാറിയില്ല. നെല്ല് സംഭരണത്തിൽ ഇതുവരെയുണ്ടാകാത്ത കാലതാമസം നേരിടുന്നു എന്നതാണ് കർഷകരെ വലയ്ക്കുന്നത്. വേനൽ മഴ എത്തിയതോടെ കൊയ്തു കൂട്ടിയ നെല്ല് കിളിർത്തു തുടങ്ങി.

കുമരകം, തിരുവാർപ്പ് പഞ്ചായത്തുകളിലായി കിടക്കുന്ന തട്ടാർകാട് – പാറേക്കാട് പാടശേഖരത്തിൽ കൊയ്ത്തു നടന്നിട്ട് 2 ആഴ്ചയായി. ഇതുവരെ നെല്ല് സംഭരിച്ചിട്ടില്ല.

360 ഏക്കർ പാടശേഖരത്തിലെ നെല്ല് കൂട്ടിയിട്ടിരിക്കുകയാണ്. എല്ലാ ദിവസവും നെല്ല് നിരത്തി ഉണങ്ങി മൂടി മൂടിയിടും. രാവിലെ കിളിർത്ത നെല്ല് പെറുക്കി കളഞ്ഞാണ് കർഷകരുടെ പണി തുടങ്ങുന്നത്.

പാഡി ഓഫീസർ സ്ഥലത്ത് എത്തുകയോ നെല്ല് സംഭരണത്തിന് നടപടി സ്വീകരിക്കുകയോ ചെയ്യുന്നില്ല എന്നാണ് കർഷകരുടെ പരാതി.

കിഴിവ് കൂട്ടി ചോദിക്കാനാണ് നെല്ല് സംഭരണം വൈകിക്കുന്നതെന്നാണ് കർഷകരുടെ ആരോപണം. സംഭരണം വൈകിയാൽ നെല്ല് കിളിർത്ത് നശിക്കും.