ജനസംഖ്യ കുറഞ്ഞാല്‍ തമിഴ്നാടിന് എട്ടോളം സീറ്റുകള്‍ നഷ്ടപ്പെടും; നവദമ്പതികള്‍ വൈകാതെ കുഞ്ഞുങ്ങള്‍ക്ക് ജന്മം നല്‍കണം: ഉദയനിധി സ്റ്റാലിന്‍
നവദമ്പതികള്‍ വൈകാതെ കുഞ്ഞുങ്ങള്‍ക്ക് ജന്മം നല്‍കണമെന്ന് തമിഴ്‌നാട് ഉപമുഖ്യമന്ത്രി ഉദയനിധി സ്റ്റാലിന്‍. പക്ഷേ അധികം കുട്ടികള്‍ വേണ്ടെന്നും അദ്ദേഹം പറഞ്ഞു. കുട്ടികള്‍ക്കു തമിഴ് പേരുകളിടണമെന്നും ഉദയനിധി ആവശ്യപ്പെട്ടു.
ചെന്നൈയില്‍ സമൂഹ വിവാഹത്തില്‍ പങ്കെടുക്കുകയായിരുന്നു അദ്ദേഹം. ആദ്യം ജനനനിയന്ത്രണം നടപ്പാക്കിയ സംസ്ഥാനം തമിഴ്‌നാടാണെന്നും അതിന്റെ പ്രശ്‌നങ്ങളാണു ഇപ്പോള്‍ നേരിടുന്നതെന്നും അദ്ദേഹം പറഞ്ഞു. കേന്ദ്രസർക്കാർ ഇപ്പോള്‍ ജനസംഖ്യാ കണക്കുകള്‍ നിരീക്ഷിച്ചുകൊണ്ടിരിക്കുകയാണെന്നും കുടുംബാസൂത്രണ നടപടികള്‍ ഫലപ്രദമായി നടപ്പിലാക്കിയ തമിഴ്‌നാടിനെതിരെ നടപടി സ്വീകരിക്കുന്നുണ്ടെന്നും ഉദയനിധി പറഞ്ഞു.
ജനസംഖ്യാടിസ്ഥാനത്തില്‍ മണ്ഡല പുനര്‍നിര്‍ണയം നടപ്പാക്കുമ്പോള്‍ ദക്ഷിണേന്ത്യന്‍ സംസ്ഥാനങ്ങളില്‍ ലോക്‌സഭാ സീറ്റുകള്‍ കുറയുമെന്ന ആശങ്ക നിലനില്‍ക്കുന്നതിനിടെയാണ് ഉദയനിധി സ്റ്റാലിന്റെ പരാമര്‍ശം. ഇന്ന് തമിഴ്‌നാട്ടില്‍ നിന്ന് 39 എംപിമാരുണ്ട്. അതിർത്തി നിർണ്ണയം നടന്നാല്‍ ഇത് 31 ആയി കുറയും. തമിഴ്‌നാടിന്റെ ജനസംഖ്യ 7 കോടിയാണ്, അതേസമയം വടക്കൻ സംസ്ഥാനങ്ങള്‍ക്ക് 100-ലധികം സീറ്റുകള്‍ ലഭിക്കും – അദ്ദേഹം പറഞ്ഞു.
Whatsapp Group 1 | Whatsapp Group 2 |Telegram Group
ഒരാഴ്ച മുമ്പ് മുഖ്യമന്ത്രി എം.കെ. സ്റ്റാലിനും സമാനമായ പരാമർശം നടത്തിയിരുന്നു. നേരത്തെ, നമ്മള്‍ പറയുമായിരുന്നു, നിങ്ങളുടെ സമയമെടുത്ത് ഒരു കുഞ്ഞിന് ജന്മം നല്‍കൂ എന്ന്. എന്നാല്‍ ഇപ്പോള്‍ സ്ഥിതി മാറി, നമ്മള്‍ അത് ഇപ്പോള്‍ പറയണം – സ്റ്റാലിൻ പറഞ്ഞു. സമയം എടുക്കൂ എന്ന് ഞാൻ പറയില്ല, പക്ഷേ ഉടൻ തന്നെ നിങ്ങളുടെ കുഞ്ഞിനെ പ്രസവിക്കൂ എന്ന് അദ്ദേഹം പറഞ്ഞിരുന്നു.
