കോട്ടയം തൃക്കൊടിത്താനത്ത് വില്പനയ്ക്ക് എത്തിച്ച എംഡിഎംഎയുമായി മുൻ പഞ്ചായത്ത് മെമ്പറുടെ മകനടക്കം രണ്ടുപേർ പിടിയിൽ

കോട്ടയം : വിൽപ്പനയ്ക്ക് എത്തിച്ച എം ഡി എം എയുമായി മുൻ പഞ്ചായത്ത് മെമ്പറുടെ മകനടക്കം 2 പേരെ തൃക്കൊടിത്താനം പോലീസ് പിടികൂടി

ചങ്ങനാശ്ശേരി വാഴപ്പള്ളി വെട്ടിത്തുരുത്ത് വട്ടപ്പറമ്പിൽ വീട്ടിൽ നിസ്സൽ ആന്റണി, ചങ്ങനാശ്ശേരി പനച്ചിക്കാവ് ഇലഞ്ഞിമൂട്ടിൽ വീട്ടിൽ അഖിൽ ജോൺ എന്നിവരാണ് പിടിയിലായത്.

ജില്ലാ പോലീസ് മേധാവി ഷാഹുൽ ഹമീദ് ഐ പി എസിന് ലഭിച്ച രഹസ്യ വിവരത്തെ തുടർന്ന് ചങ്ങനാശ്ശേരി ഡിവൈഎസ്പി എ കെ വിശ്വനാഥന്റെ നിർദേശപ്രകാരം തൃക്കൊടിത്താനം എസ്എച്ച്ഒ എം.ജെ അരുണിന്റെ നേതൃത്വത്തിൽ എസ് ഐമാരായ അരുൺകുമാർ പി എസ്, ഗിരീഷ്കുമാർ, വർഗീസ് കുരുവിള, എ എസ് ഐ സിജോ ചാണ്ടി പിള്ള, സീനിയർ സിവിൽപോലീസ് ഓഫീസർ ശ്രീകുമാർ എന്നിവർ അടങ്ങുന്ന തൃക്കൊടിത്താനം പോലീസും ജില്ലാ പോലീസ് മേധാവിയുടെ ലഹരിവിരുദ്ധ സ്‌ക്വാഡും ചേർന്നാണ് പ്രതികളെ പിടികൂടിയത്.

പിടിയിലായ പ്രതികളെ നിരന്തരം പോലീസ് നിരീക്ഷണം നടത്തി വരികയായിരുന്നു. ന്യൂ ഇയറിന് വിൽക്കാനായി ബാംഗ്ലൂരിൽ നിന്നും ബസ് മാർഗ്ഗമാണ് എം ഡി എം എ എത്തിച്ചത് എന്ന് ചോദ്യം ചെയ്യലിൽ ഇവർ പറഞ്ഞു. പ്രതികളെ കോടതിയിൽ ഹാജരാക്കി.