ഹോസ്റ്റലില്‍ വീണ് വിദ്യാര്‍ഥിനിക്ക് ഗുരുതര പരിക്കേറ്റു; വീട്ടില്‍ വിവരമറിയിച്ചില്ല; സുഹൃത്തുക്കള്‍ മുഖേന വിവരമറിഞ്ഞ ബന്ധുക്കള്‍ ആശുപത്രിയിലെത്തിയപ്പോള്‍ വിദ്യാര്‍ഥിനി ന്യൂമോണിയ ബാധിച്ച് ഗുരുതരാവസ്ഥയില്‍
സ്വന്തം ലേഖിക
അമ്പലപ്പുഴ: ഹോസ്റ്റലില്‍ വിദ്യാര്‍ഥിനി വീണ് പരിക്കേറ്റിട്ടും വിവരമറിയിച്ചില്ലെന്ന് പരാതിയുമായി ബന്ധുക്കള്‍.
സുഹൃത്തുക്കള്‍ മുഖേന വിവരമറിഞ്ഞ ബന്ധുക്കള്‍ ആശുപത്രിയിലെത്തിയപ്പോള്‍ വിദ്യാര്‍ഥിനി ന്യൂമോണിയ ബാധിച്ച് ഗുരുതരാവസ്ഥയില്‍.
Whatsapp Group 1 | Whatsapp Group 2 |Telegram Group
പുന്നപ്ര തെക്ക് പഞ്ചായത്ത് സുലൈഹ് മന്‍സിലില്‍ നൗഷാദ് റജീന ദമ്പതികളുടെ മകള്‍ ലൈസ്നക്കാണ് (19) പരിക്കേറ്റ് ഗുരുതരാവസ്ഥയില്‍ ആശുപത്രിയില്‍ കഴിയുന്നത്.
ഒന്നാം വര്‍ഷ എന്‍ജിനീയറിങ് കോളജ് വിദ്യാര്‍ഥിനിയായ ലൈസ്ന കോളജ് ഹോസ്റ്റലില്‍ കഴിഞ്ഞ 31നാണ് വീണത്.
വീഴ്ചയില്‍ ഗുരുതര പരിക്കേറ്റ കുട്ടിയെ സ്വകാര്യ ആശുപത്രിയില്‍ പ്രവേശിപ്പിച്ച വിവരം ബന്ധുക്കളെ അറിയിച്ചില്ല.
പിന്നീട് ലൈസ്നയുടെ സുഹൃത്തുക്കള്‍ മുഖേന വിവരമറിഞ്ഞ ബന്ധുക്കള്‍ ആശുപത്രിയിലെത്തിയപ്പോള്‍ ശരീരമാകെ നീരും പനിയും ശ്വാസം മുട്ടലും ബാധിച്ച് ഗുരുതരാവസ്ഥയിലായിരുന്നു.തുടര്‍ന്ന് പെണ്‍കുട്ടിയെ ആലപ്പുഴ മെഡിക്കല്‍ കോളജാശുപത്രിയിലേക്ക് മാറ്റി.
ഇപ്പോള്‍ ന്യൂമോണിയ ബാധിച്ച പെണ്‍കുട്ടി ഓക്സിജന്റെ സഹായത്താലാണ് ശ്വസിക്കുന്നത്. സംഭവത്തില്‍ കോളജ് അധികൃതരുടെ നിരുത്തരവാദിത്വപരമായ നടപടിക്കെതിരെ ബന്ധുക്കള്‍ പൊലീസില്‍ പരാതി നല്‍കി.
