കൊല്ലം: റോഡിനു കുറുകേ ചാടിയ തെരുവുനായയെ ഇടിച്ച് നിയന്ത്രണംവിട്ട ഓട്ടോ മറിഞ്ഞു. ഓട്ടോയ്ക്കുള്ളിൽ കുടുങ്ങിയ നായയുടെ കടിയേറ്റ കോട്ടപ്പുറം പുളിമൂട് ജങ്ഷനിലെ ഡ്രൈവർ വെള്ളാർവട്ടം ഹരിചന്ദനത്തിൽ വിഷുകുമാറി(57)നെ കടയ്ക്കൽ താലൂക്ക് ആശുപത്രിയിൽ പ്രവേശിപ്പിച്ചു. തിങ്കളാഴ്ച വൈകീട്ടായിരുന്നു സംഭവം.
കടയ്ക്കലിൽ യാത്രക്കാരെ ഇറക്കിയശേഷം മടങ്ങുകയായിരുന്നു ഓട്ടോ. വളവുംതെങ്ങ് ഭാഗത്തുനിന്നു വന്ന ഒരുകൂട്ടം തെരുവുനായ്ക്കളിലൊന്ന് ഓട്ടോയ്ക്കു കുറുകേ ചാടുകയായിരുന്നു. നായയെ ഇടിച്ച് നിയന്ത്രണംവിട്ടു മറിഞ്ഞ ഓട്ടോയ്ക്കുള്ളിൽ വിഷുകുമാറും പട്ടിയും കുടുങ്ങി.
കൈയിൽ കടിച്ചുതൂങ്ങിയ നായയിൽനിന്നു രക്ഷപ്പെടാനുള്ള ശ്രമം നടന്നില്ല. വേദനകൊണ്ടു പുളഞ്ഞ വിഷുകുമാർ ഒടുവിൽ മറുകൈകൊണ്ട് പട്ടിയുടെ വായ വലിച്ചുതുറന്ന് രക്ഷപ്പെടുകയായിരുന്നു.
Whatsapp Group 1 | Whatsapp Group 2 |Telegram Group
രണ്ട് കൈകളിലും കടിയേൽക്കുകയും ദേഹമാസകലം മുറിവേൽക്കുകയും ചെയ്തു. അപ്പോഴേക്കും സമീപവാസികളെത്തി ഓട്ടോയ്ക്കുള്ളിൽനിന്ന് വിഷുകുമാറിനെ പുറത്തെടുത്തു. വിഷുകുമാറിനെ ചൊവ്വാഴ്ച തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റും.
