ലൈഫ് മിഷന്‍ കോഴക്കേസില്‍ റിമാന്‍ഡിലായിരുന്ന എം ശിവശങ്കറിന് ദേഹാസ്വാസ്ഥ്യം; ആശുപത്രിയില്‍ പ്രവേശിപ്പിച്ചു

സ്വന്തം ലേഖിക

കൊച്ചി: ലൈഫ് മിഷന്‍ കോഴക്കേസില്‍ റിമാന്‍ഡില്‍ കഴിയുന്ന മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിനെ ആശുപത്രിയില്‍ പ്രവേശിപ്പിച്ചു.

ദേഹാസ്വാസ്ഥ്യം പ്രകടിപ്പിച്ചതിന് പിന്നാലെയാണ് ജയിലില്‍ നിന്നും കളമശേരി മെഡിക്കല്‍ കോളേജിലേയ്ക്ക് മാറ്റിയത്.

ലൈഫ് മിഷന്‍ കേസില്‍ ഇഡിയുടെ നേതൃത്വത്തില്‍ രേഖപ്പെടുത്തിയ ആദ്യത്തെ അറസ്റ്റായിരുന്നു എം ശിവശങ്കറിന്റേത്.

തനിക്ക് ശാരീരിക അസ്വസ്ഥതകളുണ്ടെന്നും അവ പരിഗണിച്ച്‌ ജാമ്യം അനുവദിക്കണമെന്നും ശിവശങ്കര്‍ നേരത്തെ കോടതി മുന്‍പാകെ ബോധിപ്പിച്ചിരുന്നു.

എന്നാല്‍ ഇ ഡി ജാമ്യഹര്‍ജി എതിര്‍ത്തതിന് പിന്നാലെ കോടതി റിമാന്‍ഡ് ചെയ്യുകയായിരുന്നു. തിങ്കളാഴ്ച വീണ്ടും ജാമ്യാപേക്ഷ പരിഗണിക്കാനിരിക്കേയാണ് ജയിലില്‍ വെച്ച്‌ ദേഹാസ്വാസ്ഥ്യം ഉണ്ടാവുകയും ആശുപത്രിയിലേയ്ക്ക് മാറ്റുകയും ചെയ്തത്.