മൈസൂരില്‍ റേവ്പാര്‍ട്ടിക്കിടെ പോലീസ് റെയ്ഡ്: 64 പേര്‍ കസ്റ്റഡിയില്‍, 15 പേർ അബോധാവസ്ഥയില്‍, റേവ് പാർട്ടിക്കെതിരെ നിയമ നടപടി സ്വീകരിക്കുമെന്ന് കർണാടക മുഖ്യമന്ത്രി

മൈസൂർ: മൈസൂരുവില്‍ റേവ് പാര്‍ട്ടി നടക്കുന്നതിനിടെ പോലീസ് റെയ്ഡ്. മീനാക്ഷിപുരയിലെ സ്വകാര്യ ഫാം ഹൗസില്‍ നടന്ന പാര്‍ട്ടിക്കിടെയാണ് പോലീസ് റെയ്ഡ് നടന്നത്. 64 പേരെയും നിരവധി വാഹനങ്ങളും കസ്റ്റഡിയിലെടുത്തു.

ഞായറാഴ്ച പുലര്‍ച്ചെയായിരുന്നു പോലീസ് റെയ്ഡ് നടത്തിയത്. പരിശോധനക്കിടെ 15-ഓളം പേരെ അബോധാവസ്ഥയില്‍ കണ്ടെത്തിയിട്ടുണ്ട്. എന്നാൽ പാര്‍ട്ടിയില്‍ രാസലഹരിയില്‍ കണ്ടെടുത്തതായി സ്ഥിരീകരണമില്ല.

കസ്റ്റഡിയിലെടുത്തവരുടെ രക്തസാമ്പിളുകള്‍ ശേഖരിച്ചതായും ഇതിന്റെ ഫലം വരുന്നതിന് അനുസരിച്ച് തുടര്‍നടപടികളിലേക്ക് കടക്കുമെന്നും പോലീസ് വ്യക്തമാക്കി.

റേവ് പാര്‍ട്ടിയില്‍ നിയമപരമായ നടപടികള്‍ സ്വീകരിക്കുമെന്ന് മുഖ്യമന്ത്രി സിദ്ധരാമയ്യയും പറഞ്ഞു. സംഭവത്തില്‍ പോലീസ് കൃത്യമായ അന്വേഷണം നടത്തി ആവശ്യമായ നടപടിയെടുക്കുമെന്നും അദ്ദേഹം പറഞ്ഞു.