ഗൗരിയമ്മ തപാല്‍ വോട്ട് ചെയ്തു; 1948 മുതല്‍ വോട്ട് ചെയ്യുന്ന ഗൗരിയമ്മ തപാല്‍ വോട്ട് ചെയ്യുന്നത് ചരിത്രത്തിലാദ്യം
സ്വന്തം ലേഖകന്‍
ആലപ്പുഴ: ജെഎസ്എസ് പാര്‍ട്ടി നേതാവ് കെ ആര്‍ ഗൗരിയമ്മ തപാല്‍ വോട്ട് ചെയ്തു. ചരിത്രത്തിലാദ്യ മായാണ് ഗൗരിയമ്മ തപാല്‍ വോട്ട് ചെയ്യുന്നത്. 1948 ല്‍ തിരുവിതാംകൂര്‍ നിയമസഭയിലേക്കുള്ള തെരഞ്ഞെടുപ്പു മുതല്‍ വോട്ടു ചെയ്യുന്ന ഗൗരിയമ്മ കഴിഞ്ഞ ലോക്‌സഭാ തെരഞ്ഞെടുപ്പു വരെ എല്ലാ തെരഞ്ഞെടുപ്പുകളിലും വോട്ടു ചെയ്തിട്ടുണ്ട്.
ഇന്നു രാവിലെ 11.30 ന് ആലപ്പുഴ ചാത്തനാട് കളത്തിപ്പറമ്പില്‍ വീട്ടിലെത്തിയ ഉദ്യോഗസ്ഥര്‍ ഗൗരിയമ്മയ്ക്ക് രേഖകള്‍ കൈമാറി. തുടര്‍ന്ന് വോട്ടു ചെയ്തു തിരികെ വാങ്ങി. തദ്ദേശ തെരഞ്ഞെടുപ്പിനു മുന്‍പ് വീട്ടില്‍ വീണു പരുക്കേറ്റ ഗൗരിയമ്മ അന്ന് തപാല്‍ വോട്ടിന് അപേക്ഷിച്ചിരുന്നെങ്കിലും ചട്ടമനുസരിച്ച് അപേക്ഷ അംഗീകരിക്കാനാകില്ലെന്ന് അധികൃതര്‍ അറിയിച്ചിരുന്നു.
Whatsapp Group 1 | Whatsapp Group 2 |Telegram Group
കഴിഞ്ഞ തദ്ദേശ തെരഞ്ഞെടുപ്പില്‍ മാത്രം അനാരോഗ്യം കാരണം ഗൗരിയമ്മയ്ക്ക് വോട്ട് ചെയ്യാന്‍ സാധിച്ചിരുന്നില്ല. ഇത്തവണ 80 വയസ്സിനു മേല്‍ പ്രായമുള്ളവര്‍ക്ക് ഉദ്യോഗസ്ഥര്‍ വീട്ടിലെത്തി വോട്ട് ചെയ്യാനുള്ള സൗകര്യമൊരുക്കുമെന്ന് അറിയിച്ചതിനെത്തുടര്‍ന്നാണ് ഗൗരിയമ്മ തപാല്‍ വോട്ടിന് അപേക്ഷിച്ചത്. തെരഞ്ഞെടുപ്പിന്റെ ഭാഗമാകാന്‍ കഴിഞ്ഞതിന്റെ സംതൃപ്തിയിലാണ് ഗൗരിയമ്മ.
