തിരുവനന്തപുരം: വന്യജീവി ആക്രമണങ്ങളുമായി ബന്ധപ്പെട്ട വിഷയങ്ങളിൽ സംസ്ഥാന സർക്കാർ കൂടുതൽ ഉത്തരവാദിത്തപരമായ സമീപനം സ്വീകരിക്കണമെന്ന് പ്രതിപക്ഷ നേതാവ് പിണറായി വിജയൻ. വിഷയം കഴിഞ്ഞ ദിവസം നിയമസഭയിൽ ഉന്നയിച്ചപ്പോൾ വനംമന്ത്രിയുടെ ഭാഗത്ത് നിന്ന് ലഭിച്ചത് ഗൗരവമില്ലാത്ത മറുപടിയാണെന്നും അദ്ദേഹം വിമർശിച്ചു.
കഴിഞ്ഞ രണ്ടാഴ്ചയ്ക്കിടെ സംസ്ഥാനത്ത് വന്യജീവി ആക്രമണങ്ങളിൽ ആറു പേർക്ക് ജീവൻ നഷ്ടമായതായി പിണറായി വിജയൻ ചൂണ്ടിക്കാട്ടി. ഏറ്റവും ഒടുവിൽ വയനാട് കാട്ടിക്കുളത്ത് രാജു കാട്ടാന ആക്രമണത്തിൽ കൊല്ലപ്പെട്ട സംഭവത്തെ പരാമർശിച്ച അദ്ദേഹം, ദുരന്തമുണ്ടായ സ്ഥലത്ത് ബന്ധപ്പെട്ട ഉദ്യോഗസ്ഥരോ ജനപ്രതിനിധികളോ സമയബന്ധിതമായി എത്തി സ്ഥിതിഗതികൾ വിലയിരുത്താത്തതിനെതിരെയും വിമർശനം ഉയരുന്നുണ്ടെന്ന് പറഞ്ഞു.
വന്യജീവികൾ ജനവാസ മേഖലകളിലേക്ക് കടന്നുകയറുന്നത് തടയാനും അപകടകാരികളായ മൃഗങ്ങളെ പിടികൂടുകയോ തുരത്തുകയോ ചെയ്യാനുമുള്ള സംവിധാനങ്ങൾ നിലവിലുണ്ടെങ്കിലും, അവ ഫലപ്രദമായി വിന്യസിക്കപ്പെടുന്നില്ലെന്നാണ് തുടർച്ചയായ ആക്രമണങ്ങളും ജീവഹാനികളും വ്യക്തമാക്കുന്നതെന്ന് അദ്ദേഹം ആരോപിച്ചു. ദുരിതമനുഭവിക്കുന്ന ജനങ്ങൾക്കൊപ്പം നിൽക്കുകയും അവർക്കാവശ്യമായ ആശ്വാസവും പിന്തുണയും നൽകുകയും ചെയ്യുക എന്നത് സർക്കാരിന്റെ പ്രാഥമിക ഉത്തരവാദിത്തമാണെന്നും അതിൽ നിന്ന് ഒഴിഞ്ഞുമാറുന്ന സമീപനം ജനവിരുദ്ധമാണെന്നും പിണറായി വിജയൻ പറഞ്ഞു.
Whatsapp Group 1 | Whatsapp Group 2 |Telegram Group
വന്യജീവി ആക്രമണങ്ങളിൽ ജീവൻ നഷ്ടപ്പെട്ടവരുടെ കുടുംബങ്ങളുടെ ദുഃഖത്തിൽ പങ്കുചേരുന്നതായും അവർക്കു അടിയന്തര ധനസഹായം നൽകണമെന്നും അദ്ദേഹം ആവശ്യപ്പെട്ടു. ആക്രമണങ്ങളാൽ കൃഷിനാശം സംഭവിച്ചവർക്ക് മതിയായ നഷ്ടപരിഹാരം ഉറപ്പാക്കണമെന്നും പ്രസ്താവനയിൽ ആവശ്യപ്പെട്ടു.
