മലപ്പുറം കോട്ടയ്ക്കലിൽ വിദ്യാർഥിക്കുനേരെ തെരുവുനായ ആക്രമണം;രാവിലെ സ്കൂളിലേക്ക് പോകുന്നതിനിടെയായിരുന്നു സംഭവം

സ്വന്തം ലേഖകൻ

മലപ്പുറം:കോട്ടയ്ക്കലിൽ ഒളിച്ചിരുന്ന് വിദ്യാര്‍ഥിനിക്കുനേരെ കുതിച്ചുചാടി തെരുവുനായയുടെ ആക്രമണം.പ്ലസ് വൺ വിദ്യാർഥിനി ഷിഫ്നയ്ക്കാണ് കടിയേറ്റത്.വ്യാഴാഴ്ച രാവിലെ സ്കൂളിലേക്ക് പോകുന്നതിനിടെയായിരുന്നു സംഭവം.

തെരുവുനായ കുട്ടിയെ അക്രമിക്കുന്നതിന്റെ സി.സി.ടി.വി ദൃശ്യങ്ങൾ പുറത്തുവന്നു.പതുങ്ങിയിരുന്ന് വിദ്യാർഥിനിയുടെ നേരെ നായ ചാടുന്നതായാണ് ദൃശ്യങ്ങളിൽ കാണുന്നത്.കുട്ടി തിരിഞ്ഞ് ഓടി രക്ഷപ്പെടാൻ ശ്രമിച്ചതിനിടെ വീഴുന്നതും നായ വിടാതെ ആക്രമണം തുടരുന്നതും ദൃശ്യങ്ങളിൽ കാണാം.

ഇതിനിടെ കുട്ടിയുടെ ശബ്ദം കേട്ട് സ്ഥലത്തെത്തിയ പ്രദേശവാസികളാണ് വിദ്യാർഥിനിയെ രക്ഷപ്പെടുത്തിയത്.ഷിഫ്നയുടെ കൈയ്ക്ക് നിസാരമായ പരിക്കുണ്ട്. നിലവിൽ കുട്ടി മഞ്ചേരി മെഡിക്കൽ കോളേജ് ആശുപത്രിയിൽ ചികിത്സയിലാണ്.