കോട്ടയം : കോട്ടയം മെഡിക്കൽ കോളേജിൽ ഒരു തുള്ളി വെള്ളം കിട്ടാനില്ല. ആയിരക്കണക്കിന് സാധാരണക്കാർ ആശ്രയിക്കുന്ന പ്രധാന ആശുപത്രിയുടെ ദയനീയാവസ്ഥയാണിത്.
വാർഡിൽ രോഗികളുടെ കൂട്ടിരിപ്പുകാർ അനുഭവിക്കുന്ന ദുരിതം ചില്ലറയല്ല. വാർഡുകളിൽ ശുദ്ധമായ കുടിവെള്ള സംവിധാനം ഏർപ്പെടുത്താൻ അധികൃതർ തയ്യാറാകുന്നില്ല. ബാത്ത് റൂമിൽ ഉപയോഗിക്കുന്നതിനും, പാത്രം കഴുകുന്നതിനും പൈപ്പ് ലൈനിലൂടെ വെള്ളമെത്തും.
ഇത് ക്ലോറിൻ കലർന്നതിനാൽ കുടിയ്ക്കാനാകില്ല. ആശുപത്രിയ്ക്ക് സമീപത്തെ ഹോട്ടലുകളേയും തട്ടുകടകളേയുമാണ് ചൂടുള്ള കുടിവെള്ളത്തിനായി സമീപിക്കേണ്ട ഗതികേടാണ്.
Whatsapp Group 1 | Whatsapp Group 2 |Telegram Group
പാചകവാതക ക്ഷാമം നേരിടുന്നതിനാൽ ചൂടുവെള്ള വിതരണത്തിന് ഭക്ഷണശാലകൾ മടിക്കുകയാണെന്ന് രോഗികളുടെ ബന്ധുക്കൾ പറയുന്നു.
പണം കൊടുത്തു വാങ്ങാൻ കഴിയാത്ത നിരവധി രോഗികളാണ് ആശുപത്രിയിൽ ചികിത്സയിൽ കഴിയുന്നത്. ബഹുഭൂരിപക്ഷം പേർക്കും സന്നദ്ധ സംഘടനകൾ നൽകുന്ന ഭക്ഷണമാണ് ആശ്രയം.
മെഡിക്കൽ കോളേജിൽ നിരവധി വികസന പ്രവർത്തനങ്ങൾ നടപ്പാക്കിയെങ്കിലും അടിസ്ഥാന സൗകര്യങ്ങൾ അപര്യാപ്തമാണ്.
