കിരീട പോരാട്ടം ; മൂന്നാം തവണയും ട്രോഫി ഉയർത്തുവാനുള്ള ശ്രമം ; ചാമ്പ്യൻസ് ട്രോഫിയിൽ ഇന്ത്യ ഇന്ന് ന്യൂസിലൻഡിനെ നേരിടും ; ഉച്ചകഴിഞ്ഞ് 2.30 ന് മത്സരം
ദുബായ് : ഐസിസി ചാമ്പ്യൻസ് ട്രോഫിയിൽ ഇന്ത്യക്ക് ഇന്ന് കിരീടപ്പോരാട്ടം.ന്യൂസിലൻഡാണ് എതിരാളികൾ. മൂന്നാം തവണ ചാമ്പ്യൻസ് ട്രോഫി ഉയർത്തുവാനുള്ള ആഗ്രഹത്തോടെ ഇന്ത്യയും, കിരീടങ്ങൾ അന്യമായ ടീമെന്ന ഖ്യാതി തച്ചുടയ്ക്കാൻ കിവീസും കളത്തിൽ ഇറങ്ങുമ്പോൾ മത്സരം കടുത്തതാവും. ദുബായ് ഇന്‍റർനാഷണല്‍ ക്രിക്കറ്റ് സ്റ്റേഡിയത്തില്‍ ഉച്ചകഴിഞ്ഞ് 2.30 ന് മത്സരം ആരംഭിക്കും.
ബാറ്റർമാരും സ്പിന്നർമാരും തമ്മിലുള്ള പോരാട്ടമാകും നടക്കുക. മിച്ചല്‍ സാന്‍റനറുടെയും വരുണ്‍ ചക്രവർത്തിയുടെയും പ്രകടനം ഇരുടീമിനും നിർണായകമാകും. അതേസമയം പരിക്കേറ്റ പേസർ മാറ്റ് ഹെൻറി ഇന്ന് കളിച്ചേക്കില്ല. കഴിഞ്ഞ മത്സരത്തില്‍ ഇന്ത്യക്കെതിരേ അഞ്ച് വിക്കറ്റ് നേടിയ ഹെൻറിയുടെ അഭാവം കിവികള്‍ക്ക് വലിയ തിരിച്ചടിയാകും.
കഴിഞ്ഞ 15 വർഷം കരുത്തരായി ഐസിസി ടൂർണമെന്‍റുകളില്‍ മുന്നേറ്റംനടത്തുന്ന ഇന്ത്യയുടെ തുടർച്ചയായ മൂന്നാം ചാന്പ്യൻസ് ട്രോഫി ഫൈനലാണിത്. എല്ലാ മത്സരങ്ങളും ഒരേ സ്റ്റേഡിയത്തില്‍ കളിച്ച ഇന്ത്യക്ക് പിച്ചിന്‍റെ ആനുകൂല്യമുണ്ട്.
Whatsapp Group 1 | Whatsapp Group 2 |Telegram Group
വിരാട് കോഹ്‌ലി, രോഹിത് ശർമ, രവീന്ദ്ര ജഡേജ തുടങ്ങിയ സീനിയർ താരങ്ങളുടെ അവസാന ചാന്പ്യൻസ് ട്രോഫിയാകാൻ സാധ്യതയുള്ള ഫൈനലില്‍ കപ്പില്‍ കുറഞ്ഞൊന്നും ഇന്ത്യ പ്രതീക്ഷിക്കില്ല. അതേസമയം ന്യൂസിലൻഡ് ക്രിക്കറ്റിന്‍റെ സുവർണ തലമുറയാണ് ഈ സംഘം. ഓരോ ഐസിസി ടൂർണമെന്‍റിലും സ്ഥിരതയോടെ അവർ കളിച്ചു.
കിവികള്‍ ക്രിക്കറ്റ്ചരിത്രത്തില്‍ നേടിയത് രണ്ടേ രണ്ട് ഐസിസി കിരീടങ്ങളാണ്. 2000ത്തിലെ ഐസിസി നോക്കൗട്ട് ട്രോഫിയും 2021ല്‍ ടെസ്റ്റ് ചാന്പ്യൻഷിപ്പും. രണ്ടുതവണയും പരാജയപ്പെടുത്തിയത് ഇന്ത്യയെ ആയിരുന്നുവെന്നത് അവരുടെ ആത്മവിശ്വാസം കൂട്ടും. അതേസമയം ഗ്രൂപ്പ് ഘട്ടത്തില്‍ അവർക്കതിരേ നേടിയ മികച്ച ജയവും ടീമിന്‍റെ ഫോമും ഇന്ത്യക്ക് ആത്മവിശ്വാസം നല്‍കും.
ഞായറാഴ്ച നടന്ന ഒരു ഫൈനല്‍ മത്സരത്തിലും ഇന്ത്യക്ക് വിജയിക്കാൻ കഴിഞ്ഞിട്ടില്ലെന്നതാണു ചരിത്രം. 2000ത്തിലെ നോക്കൗട്ട് കപ്പ് (ഇപ്പോഴത്തെ ചാന്പ്യൻസ് ട്രോഫി) ഫൈനല്‍ മുതല്‍ 2023ലെ ഏകദിന ലോകപ്പ് ഫൈനല്‍ വരെയുള്ള തോല്‍വികള്‍ ടീം ഏറ്റുവാങ്ങിയത് ഞായറാഴ്ചയായിരുന്നു.
ഐസിസി ടൂർണമെന്‍റ് ഫൈനലില്‍ ഇന്ത്യ ഞായറാഴ്ച നേടിയ ഏകവിജയം 2013ലെ ചാന്പ്യൻസ് ട്രോഫിയില്‍ ഇംഗ്ലണ്ടിനെതിരേയായിരുന്നു. എന്നാല്‍ മഴ വില്ലനായ മത്സരം തിങ്കളാഴ്ച ആയിരുന്നു അവസാനിച്ചത്.
