ഒരു കിലോ സവോളയ്ക്ക് മൂന്ന് ഊണ്: സവോളയ്ക്ക് പകരം ലഭിക്കുക മൂന്നു ഫിഷ് കറി ഊണ്: വിലക്കയറ്റക്കാലത്ത് കിടിലൻ ഓഫറുമായി കോട്ടയം ശാസ്ത്രി റോഡിലെ ഹോട്ടൽ 

സ്വന്തം ലേഖകൻ

കോട്ടയം: ഒരു കിലോ സവാള തന്നാൽ പകരം മൂന്ന് ഫിഷ്‌കറി ഊണ് തരാം. കോട്ടയം ശാസ്ത്രി റോഡിലെ ഹോട്ടൽ റോയൽ പാർക്കിന്റെ കിടിലൻ ഓഫറാണ് വിലക്കയറ്റക്കാലത്ത് താരമായി മാറുന്നത്. വിലക്കയറ്റം കൊണ്ടു പൊറുതിമുട്ടിയ മലയാളിയ്ക്കു മുന്നിലേയ്ക്കാണ് ശാസ്ത്രി റോഡിലെ ഹോട്ടൽ റോയൽ പാർക്ക് ഓഫർ വയ്ക്കുന്നത്. മാർക്കറ്റിൽ ലഭിക്കുന്ന വലിയ സവാള ഒരു കിലോ എത്തിച്ചു നൽകിയാലാണ് മൂന്ന് ഫിഷ്‌കറി മീൽസ് എന്ന ഓഫർ സ്ഥാപനം മുന്നോട്ടു വയ്ക്കുന്നത്.

നിലവിൽ 150 രൂപയാണ് ഒരു കിലോ സവോളയ്ക്ക് മാർക്കറ്റിലെ വില. വലിയ സവോളയാണ് ഹോട്ടലുകളിൽ പാചകത്തിനായി ഉപയോഗിക്കുന്നത്. ഈ സവാള എത്തിച്ചു നൽകുന്നവർക്കാണ് മീൻ കറികൂട്ടി കിടിലൻ ഊണ് നൽകുമെന്നതാണ് വാഗ്ദാനം.

മാർക്കറ്റിൽ സവോളയ്ക്ക് വൻവിലയാണ് ഇപ്പോൾ. ഈ സാഹചര്യത്തിൽ ഹോട്ടലുകൾ തങ്ങളുടെ വിഭവങ്ങളിൽ നിന്നും സവോള പൂർണമായും ഒഴിവാക്കുകയാണ്. ഇതിനിടെയാണ് ഒരു കിലോ സവോളയ്ക്ക് മൂന്ന്  ഊണ് ഫ്രീ എന്ന ഓഫറുമായി ശാസ്ത്രി റോഡിലെ ഹോട്ടൽ രംഗത്ത് എത്തിയിരിക്കുന്നത്.

കോട്ടയം നഗരത്തിൽ മികച്ച ഗുണനിലവാരത്തിൽ ഏറ്റവും കുറഞ്ഞ വിലയിൽ ഊണ് ലഭിക്കുന്നതും സാധാരണക്കാർക്ക് ഏറെ പ്രയോജനകരമായി പ്രവർത്തിക്കുന്ന ഹോട്ടലാണ് റോയൽ പാർക്ക്. ശാസ്ത്രി റോഡിൽ കണ്ടത്തിൽ ലോഡ്ജിന്റെ ഏറ്റവും താഴത്തെ നിലയിലാണ് ഹോട്ടൽ പ്രവർത്തിക്കുന്നത്. കഴിഞ്ഞ മാസം വരെ  നാൽപ്പത് രൂപയ്ക്കായിരുന്നു ഒരു ഊണ് ഇവിടെ ലഭിച്ചിരുന്നത്. നിലവിൽ അൻപത് രൂപയാണ് ഒരു ഊണിന് വില.