നാല് വയസുകാരനെക്കൊണ്ട് ടൂറിസ്റ്റ് ബസ് ഓടിപ്പിച്ചു; യുവാവിനെതിരെ നടപടിക്കൊരുങ്ങി പത്തനംതിട്ട ആർടി​ഒ; സംഭവം പുറത്ത് വന്നത് വണ്ടി ഓടിപ്പിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ

പത്തനംതിട്ട: നാലുവയസുകാരനെ കൊണ്ട് ടൂറിസ്റ്റ് ബസ് ഓടിപ്പിച്ച യുവാവിനെതിരെ നടപടിക്കൊരുങ്ങി പത്തനംതിട്ട ആർടിഒ. പത്തനംതിട്ട സ്വദേശിയായ അഭിഷേകാണ് കുട്ടിയെ കൊണ്ട് ബസ് ഓടിപ്പിച്ചത്.

കുഞ്ഞിനെ മടിയിലിരുത്തി ബസ് അപകടകരമാം വിധം ഓടിക്കുകയായിരുന്നു. കലഞ്ഞൂർ – പത്തനാപുരം റോഡിലായിരുന്നു സംഭവം. സംഭവത്തിൽ അടിയന്ത നടപടി സ്വീകരിക്കുമെന്ന് പത്തനംതിട്ട ആർടിഒ അറിയിച്ചു.കുട്ടിയെ കൊണ്ട് വണ്ടി ഓടിപ്പിക്കുന്നതിന്റെ ദൃശ്യങ്ങൾ സമൂഹമാധ്യമങ്ങൾ വഴിയാണ് പുറത്ത് വന്നത്. യുവാവിനൊപ്പം രണ്ട് കുട്ടികളെ ദൃശ്യത്തിൽ കാണാം.

കുട്ടിയെക്കൊണ്ട് ബസ് ഓടിപ്പിക്കുന്നതിനിടെ യുവാവ് ഫോണും ഉപയോഗിക്കുന്നുണ്ട്. കുട്ടിയെക്കൊണ്ട് വണ്ടിയോടിപ്പിച്ച അഭിഷേകിന് ഹെവി ലൈസൻസില്ല. സമൂഹമാധ്യമങ്ങളിൽ വ്യാപകമായി പ്രചരിച്ച വിഡിയോ ശ്രദ്ധയിൽപ്പെട്ട പത്തനംതിട്ട ആർടിഒ ഡ്രൈവറോട് തിങ്കളാഴ്ച ഓഫിസിൽ ഹാജരാകാൻ ആവശ്യപ്പെട്ടിട്ടുണ്ട്.