എരുമേലി ഉറുമ്പിൽ പാലത്തിന് സമീപം സാമ്പത്തിക വിഷയത്തെ ചൊല്ലി യുവാക്കൾ തമ്മിൽ തർക്കം; റോഡിലേക്ക് തെറിച്ചുവീണ യുവാവിന്റെ ശരീരത്തുകൂടി പിക്കപ് വാൻ കയറി ഇറങ്ങി; തുമരംപാറ സ്വദേശിക്ക് ദാരുണാന്ത്യം

സ്വന്തം ലേഖകൻ

കോട്ടയം: എരുമേലി ഉറുമ്പിൽ പാലത്തിന് സമീപം സാമ്പത്തിക വിഷയത്തെത്തുടർന്നുണ്ടായ തർക്കത്തിൽ യുവാവിന് ദാരുണാന്ത്യം. തുമരംപാറ സ്വദേശി മല്ലപ്പള്ളി വീട്ടിൽ ബിബിൻ (19) ആണ് മരിച്ചത്.

ചൊവ്വാഴ്ച വൈകിട്ട് ആറുമണിയോടെ ആയിരുന്നു സംഭവം . സാമ്പത്തിക വിഷയത്തെ ചൊല്ലിയുണ്ടായ തർക്കത്തിനിടയിൽ ഉന്തും തള്ളുമുണ്ടായി. ബിബിനെ സുഹൃത്തായ കൊല്ലംപറമ്പിൽ വിഷ്ണു പിടിച്ചു തള്ളുകയായിരുന്നുവെന്ന് നാട്ടുകാർ പറയുന്നു.

റോഡിലേക്ക് വീണ ബിബിന്റെ ദേഹത്തു കൂടി പിക്കപ്പ് വാൻ കയറി ഇറങ്ങുകയായിരുന്നു.

ഉടൻതന്നെ ബിബിനെ എരുമേലി സർക്കാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ജെസിബി ഡ്രൈവറാണ് വിഷ്ണു.