ഹിന്ദുക്കൾക്ക് കുടിവെള്ളം നിഷേധിച്ചുവെന്ന വ്യാജപ്രചരണം ; ബിജെപി എംപി ശോഭയ്‌ക്കെതിരെ കേസെടുത്തു

സ്വന്തം ലേഖകൻ

മലപ്പുറം: ഹിന്ദുക്കൾക്ക് കുടിവെള്ളം നിഷേധിച്ചുവെന്ന് ട്വിറ്ററിൽ വ്യാജ പ്രചാരണം നടത്തിയ ബി.ജെ.പി എംപി ശോഭ കരന്തലജെക്കെതിരെ കേസെടുത്തു. മലപ്പുറം കുറ്റിപ്പുറത്താണ് സംഭവം. മതസ്പർദ്ധ വളർത്താനുള്ള ശ്രമത്തിനെതിരെ 153 A വകുപ്പ് പ്രകാരമാണ് കുറ്റിപ്പുറം പൊലീസ് കേസെടുത്തിരിക്കുന്നത്.

പൗരത്വ നിയമ ഭേദഗതിയെ അനുകൂലിച്ചതിന്റെ പേരിൽ പ്രദേശത്തെ കിണറിൽ നിന്ന് ഹൈന്ദവർക്ക് കുടിവെള്ളം നിഷേധിച്ചുവെന്നായിരുന്നു ശോഭ കരന്തലജെയുടെ ട്വീറ്റ് ചെയ്തത്.

വർഗീയത സൃഷ്ടിക്കുന്ന ശോഭയുടെ പോസ്റ്റിനെതിരെ സുപ്രീംകോടതി അഭിഭാഷകൻ സുഭാഷ് ചന്ദ്രൻ കെ.ആർ മലപ്പുറം പൊലീസ് സൂപ്രണ്ടിന് പരാതി നൽകി. ഇതിന്റെ അടിസ്ഥാനത്തിലാണ് ശോഭയ്ക്കെതിരെ പൊലീസ് കേസെടുത്തത്.