കൊച്ചി : നടിയെ ആക്രമിച്ച കേസില് ശിക്ഷാവിധി മരവിപ്പിക്കണമെന്ന പ്രതികളുടെ ആവശ്യത്തില് ഹൈക്കോടതി വാദം കേള്ക്കും. പള്സര് സുനി ഉള്പ്പടെയുള്ള പ്രതികളുടെ ഹര്ജിയിലാണ് ഹൈക്കോടതി ഡിവിഷൻ ബെഞ്ചിന്റെ വാദം. വാദം കേള്ക്കാനായി അപ്പീല് രണ്ടാഴ്ചയ്ക്ക് ശേഷം പരിഗണിക്കും. അതേസമയം കേസില് അതിജീവിതയുടെ ഹര്ജി ഹൈക്കോടതി ഫയലില് സ്വീകരിച്ചു. കേസിലെ പ്രധാന തെളിവായ മെമ്മറി കാര്ഡും പെന്ഡ്രൈവും ഹാജരാക്കണമെന്നും നിർദ്ദേശമുണ്ടായിരുന്നു. മെമ്മറി കാര്ഡും പെന്ഡ്രൈവും നേരിട്ട് കോടതിയില് ഹാജരാക്കണമെന്നാണ് ഹൈക്കോടതി നിർദേശിച്ചത്. ഒരു മാസത്തിനകം മുദ്രവച്ച കവറില് ഹാജരാക്കാന് എറണാകുളം പ്രിന്സിപ്പല് സെഷന് കോടതിയോടായിരുന്നു ഹൈക്കോടതിയുടെ നിര്ദേശം.
അതിജീവിത ഉന്നയിച്ച വാദങ്ങളെല്ലാം പ്രഥമദൃഷ്ട്യാ നിലനില്ക്കുമെന്നായിരുന്നു ഹൈക്കോടതി സിംഗിള് ബഞ്ചിന്റെ നിരീക്ഷണം. ജസ്റ്റിസ് സിഎസ് ഡയസ് അധ്യക്ഷനായ സിംഗില് ബെഞ്ചാണ് അതിജീവിതയുടെ ഹര്ജി പരിഗണിച്ചത്. നടിയെ ആക്രമിച്ച കേസിലെ പ്രധാന തെളിവായ മെമ്മറി കാര്ഡ് വിചാരണക്കോടതിയുടെ അടക്കം കസ്റ്റഡിയിലിരിക്കെ മൂന്നു തവണ നിയമവിരുദ്ധമായി പരിശോധിക്കപ്പെട്ടുവെന്നായിരുന്നു അതിജീവിതയുടെ ആക്ഷേപം.
