ബെല്ഫാസ്റ്റ്: എഫ്ഐഎച്ച് പ്രോ ലീഗ് ഹോക്കിയില് പാകിസ്ഥാനെതിരെ ഇന്ത്യക്ക് തകര്പ്പന് വിജയം. ഒന്നിനെതിരെ ഏഴ് ഗോളുകള്ക്കാണ് ജയം.
മത്സരത്തിന്റെ തുടക്കത്തില് ഒരു ഗോളിന് പിന്നില് നിന്ന ശേഷമാണ് ഇന്ത്യ ഗംഭീര തിരിച്ചുവരവ് നടത്തിയത്. സുഖ്ജീത് സിംഗ്, ഹര്മന്പ്രീത് സിംഗ്, ജുഗ്രാജ് സിംഗ്, അഭിഷേക്, രാജ്കുമാര് പാല്, ദില്പ്രീത് സിംഗ് എന്നിവരാണ് ഇന്ത്യക്കായി ലക്ഷ്യം കണ്ടത്. ഇംഗ്ലണ്ടിനെതിരായ ഷൂട്ടൗട്ട് പരാജയത്തിന് പിന്നാലെയാണ് ഇന്ത്യയുടെ ഈ മിന്നുന്ന വിജയം.
മത്സരത്തിന്റെ 13-ാം മിനിറ്റില് ലഭിച്ച പെനാല്റ്റി കോര്ണര് മുതലെടുത്ത് അബു മഹ്മൂദിലൂടെ പാകിസ്ഥാനാണ് ആദ്യം ലീഡ് നേടിയത്. എന്നാല് രണ്ടാം ക്വാര്ട്ടറില് തന്നെ ഇന്ത്യ തിരിച്ചടിച്ചു. ഹര്മന്പ്രീത് സിംഗിന്റെ പെനാല്റ്റി കോര്ണര് സുഖ്ജീത് സിംഗ് ഗോളാക്കി മാറ്റി. തൊട്ടുപിന്നാലെ ഹര്മന്പ്രീത് സിംഗ് തന്നെ നേരിട്ട് പെനാല്റ്റി കോര്ണര് ലക്ഷ്യത്തിലെത്തിച്ച് ഇന്ത്യക്ക് ലീഡ് നല്കി. പാകിസ്ഥാന് ഡിഫന്ഡര് അഹമ്മദ് നദീമിന് മുഖത്ത് പരിക്കേറ്റത് അവരുടെ പ്രതിരോധത്തെ ദുര്ബലമാക്കി.
ഇത് മുതലാക്കി ഇന്ത്യ ആക്രമണം ശക്തമാക്കി. മൂന്നാം ക്വാര്ട്ടറില് മാത്രം നാല് ഗോളുകളാണ് ഇന്ത്യ അടിച്ചുകൂട്ടിയത്. പെനാല്റ്റി സ്ട്രോക്കിലൂടെയും മികച്ച കൗണ്ടര് അറ്റാക്കിംഗിലൂടെയും ജുഗ്രാജ് സിംഗ്, അഭിഷേക്, രാജ്കുമാര് പാല് എന്നിവര് സ്കോര്ബോര്ഡ് ചലിപ്പിച്ചു. അവസാന ക്വാര്ട്ടറില് ദില്പ്രീത് സിംഗ് കൂടി ഗോള് നേടിയതോടെ ഇന്ത്യ ജയം പൂര്ത്തിയാക്കി.
Whatsapp Group 1 | Whatsapp Group 2 |Telegram Group
കഴിഞ്ഞ മത്സരങ്ങളില് പരിഹരിക്കപ്പെടാതെ കിടന്ന പെനാല്റ്റി കോര്ണര് കണ്വേര്ഷനിലും പ്രതിരോധത്തിലും വലിയ പുരോഗതിയാണ് ഇന്ത്യ ഈ മത്സരത്തില് കാഴ്ചവെച്ചത്. ഇംഗ്ലണ്ടിനെതിരായ അവസാന പ്രോ ലീഗ് മത്സരത്തിന് മുന്പുള്ള ഈ വിജയം ടീമിന് വലിയ ആത്മവിശ്വാസം നല്കും.
മറുവശത്ത്, ടൂര്ണമെന്റില് ഒരു ജയം പോലും നേടാനാകാതെ വലയുകയാണ് പാകിസ്ഥാന്. ഞായറാഴ്ച നടക്കുന്ന അവസാന മത്സരത്തില് ഇന്ത്യ ഇംഗ്ലണ്ടിനെ നേരിടും.
