തിരുവനന്തപുരം: സംസ്ഥാനത്ത് എയിംസ് സ്ഥാപിക്കുന്നതുമായി ബന്ധപ്പെട്ട് ജില്ലകളില് യാതൊരുവിധ നിബന്ധനകളും സംസ്ഥാന സർക്കാർ മുന്നോട്ട് വയ്ക്കില്ലെന്ന് ആരോഗ്യമന്ത്രി കെ. മുരളീധരൻ.
കേന്ദ്ര സർക്കാർ നിശ്ചയിക്കുന്ന സംസ്ഥാനത്തെ ഏത് പ്രദേശത്തും എയിംസ് അനുവദിക്കാൻ കോണ്ഗ്രസ് നേതൃത്വത്തിലുള്ള യുഡിഎഫ് സർക്കാർ തയ്യാറാണെന്ന് മന്ത്രി വ്യക്തമാക്കി.
വർഷങ്ങളായി നീണ്ടുപോകുന്ന എയിംസ് പദ്ധതി എത്രയും വേഗം യാഥാർത്ഥ്യമാക്കുകയാണ് സർക്കാരിന്റെ ലക്ഷ്യം. ഇതിനായി കേന്ദ്ര സർക്കാരുമായി സഹകരിക്കാൻ സംസ്ഥാന സർക്കാർ തയ്യാറാണെന്നും അദ്ദേഹം അറിയിച്ചു.
‘കേരളത്തിലെ പല ജില്ലകളിലും എയിംസിന് ആവശ്യമായ ഭൂമി ലഭ്യമാണ്. പദ്ധതി കേരളത്തില് വരണമെന്നത് മാത്രമാണ് ഞങ്ങളുടെ ലക്ഷ്യം, അതിനായി പ്രത്യേക നിബന്ധനകളൊന്നും വയ്ക്കുന്നില്ല.’ -മുരളീധരൻ പറഞ്ഞു.
Whatsapp Group 1 | Whatsapp Group 2 |Telegram Group
കേന്ദ്രത്തിന് അനുയോജ്യമെന്ന് തോന്നുകയാണെങ്കില് പാലക്കാട് പോലുള്ള ജില്ലകളെപ്പോലും പരിഗണിക്കുന്നതില് സംസ്ഥാനത്തിന് എതിർപ്പില്ലെന്ന് മന്ത്രി കൂട്ടിച്ചേർത്തു.
അതേസമയം, ആലപ്പുഴ ജില്ലയും പദ്ധതിക്കുവേണ്ടി പരിഗണനയിലുണ്ടെന്ന് അദ്ദേഹം സൂചന നല്കി. തൃശൂർ എംപിയും കേന്ദ്രമന്ത്രിയുമായ സുരേഷ് ഗോപിയെ പരോക്ഷമായി വിമർശിച്ച ആരോഗ്യമന്ത്രി, എയിംസ് തൃശൂരില് സ്ഥാപിക്കണമെന്ന ആവശ്യവുമായി ഒരു കോണില് നിന്നും ശുപാർശകളൊന്നും ഇതുവരെ വന്നിട്ടില്ലെന്നും വ്യക്തമാക്കി.
വിഷയം വേഗത്തിലാക്കാൻ കേന്ദ്ര സർക്കാരുമായി ഉടൻ തന്നെ ചർച്ചകള് നടത്തുമെന്നും മുരളീധരൻ പറഞ്ഞു.
