തിരുവനന്തപുരം : ലൈംഗികാരോപണ കേസില് നാളെ മുൻകൂര് ജാമ്യാപേക്ഷ പരിഗണിക്കാനിരിക്കെ പുതിയ ഹര്ജിയുമായി രാഹുല് മാങ്കൂട്ടത്തില്.
നാളെ അടച്ചിട്ട കോടതി മുറിയില് മുൻകൂര് ജാമ്യ ഹര്ജി പരിഗണിക്കണമെന്നാവശ്യപ്പെട്ടാണ് തിരുവനന്തപുരം സെഷൻസ് കോടതിയില് ഹര്ജി നല്കിയത്. ഇതിനിടെ, പാലക്കാട് തുടരുന്ന എസ്ഐടി സംഘം വീണ്ടും രാഹുലിന്റെ ഫ്ലാറ്റിലെത്തി. ഫ്ലാറ്റിലെ കെയര്ടേക്കറുടെ മൊഴി രേഖപ്പെടുത്തി.
സിസിടിവി ദൃശ്യങ്ങള് കെയർടേക്കറെ സ്വാധീനിച്ച് രാഹുലും സംഘവും നശിപ്പിച്ചെന്ന നിഗമനത്തിലായിരുന്നു എസ്ഐടി. ഇക്കാര്യങ്ങളിലടക്കം കൂടുതല് വിവരങ്ങള് തേടുന്നതിനായാണ് കെയര് ടേക്കറുടെ മൊഴിയെടുത്തത്.
Whatsapp Group 1 | Whatsapp Group 2 |Telegram Group
കഴിഞ്ഞ വ്യാഴാഴ്ച വൈകിട്ട് 4.30 ന് ഫ്ലാറ്റില് നിന്ന് ജോലി കഴിഞ്ഞ് വീട്ടിലേക്ക് പോയെന്നും രാഹുല് വ്യാഴാഴ്ച വൈകിട്ട് ഫ്ലാറ്റില് എത്തിയതിനെ കുറിച്ച് അറിയില്ലെന്നുമാണ് കെയര്ടേക്കറുടെ മൊഴി. സിസിടിവി സംവിധാനത്തില് യാതൊരു ഇടപെടലും നടത്തിയിട്ടില്ലെന്ന് കെയർടേക്കര് മൊഴി നല്കി.
