കേരളത്തിന് അഭിമാനം ; 2023ലെ രാജ്യത്തെ മികച്ച പത്തു പൊലീസ് സ്റ്റേഷനുകളില്‍ ഒന്നായി കേരളത്തില്‍ നിന്ന് കുറ്റിപ്പുറം പൊലീസ് സ്റ്റേഷനെ കേന്ദ്ര ആഭ്യന്തര മന്ത്രാലയം തെരഞ്ഞെടുത്തു

തിരുവനന്തപുരം : കുറ്റിപ്പുറം സ്റ്റേഷൻ രാജ്യത്തെ മികച്ച പത്തു പൊലീസ് സ്റ്റേഷനുകളില്‍ ഒന്ന്.വിവിധ സംസ്ഥാനങ്ങളില്‍ നിന്നുള്ള 17,000 അപേക്ഷകളില്‍ നിന്നാണ് മികച്ച പൊലീസ് സ്റ്റേഷനെ തെരഞ്ഞെടുത്തത്. രാജ്യത്തെ മികച്ച പത്തു പൊലീസ് സ്റ്റേഷനുകളില്‍ ഒമ്ബതാം സ്ഥാനത്തും സംസ്ഥാനതലത്തില്‍ ഒന്നാം സ്ഥാനത്തുമാണ് മലപ്പുറം ജില്ലയിലെ കുറ്റിപ്പുറം പൊലീസ് സ്റ്റേഷൻ.

2023ല്‍ രജിസ്റ്റർ ചെയ്ത പരാതികള്‍, കേസ് തീർപ്പാക്കല്‍, സമയബന്ധിതമായി കുറ്റപത്രം സമർപ്പിക്കല്‍, കേസുകളുടെ എണ്ണം, സ്ത്രീകള്‍ക്കും കുട്ടികള്‍ക്കും വയോജനങ്ങള്‍ക്കും നേരെയുള്ള അതിക്രമങ്ങള്‍ പരിഹരിക്കല്‍ തുടങ്ങിയവ പരിഗണിച്ചാണ് മികച്ച സ്റ്റേഷനായി കുറ്റിപ്പുറം പൊലീസ് സ്റ്റേഷനെ തെരഞ്ഞെടുത്തത്.

ഫെബ്രുവരി ആറിന് തിരുവനന്തപുരത്തു നടക്കുന്ന ചടങ്ങില്‍ മുഖ്യമന്ത്രി പിണറായി വിജയൻ കുറ്റിപ്പുറം പൊലീസ് സ്റ്റേഷൻ ഹൗസ് ഓഫീസർക്ക് ബഹുമതി സമ്മാനിക്കുമെന്ന് കേരള പൊലീസ് ഫേസ്‌ബുക്കിലൂടെ അറിയിച്ചു.