മൊബൈല്‍ ഫോണ്‍ നഷ്ടമായാലോ??ട്രാക്ക് ചെയ്യാം, നിയന്ത്രിക്കാം, കണ്ടെത്താം; നഷ്ടപ്പെട്ട ആൻഡ്രോയിഡ് ഫോണുകള്‍ കണ്ടെത്താനുള്ള വഴികള്‍.
സ്വന്തം ലേഖകൻ
മൊബൈൽ ഫോൺ ഇല്ലാത്ത സാഹചര്യത്തെ പറ്റി ചിന്തിക്കാൻ പോലും കഴിയില്ല ഇന്നത്തെ തലമുറയ്ക്ക്. മിക്ക ആളുകളുടെയും ദൈനംദിന ജീവിതത്തിന്റെ ഭാഗമായി മാറിക്കഴിഞ്ഞു
ബാങ്കിങ് സേവനങ്ങൾ മുതൽ മറ്റുള്ള വ്യക്തിഗതവിവരങ്ങള്‍ ഉള്‍പ്പടെ സ്മാര്‍ട്ഫോണുകളില്‍ രേഖപ്പെടുത്തി സംരക്ഷിക്കുന്നവരാണ് ഭൂരിഭാഗവും.അപ്പോള്‍ മൊബൈല്‍ ഫോണ്‍ നഷ്ടമായാലോ?
Whatsapp Group 1 | Whatsapp Group 2 |Telegram Group
ഇനി അപ്രതീക്ഷിതമായി ഫോണ്‍ നഷ്ടപ്പെട്ടാല്‍ സമ്മര്‍ദ്ദത്തില്‍ ആകേണ്ട കാര്യമില്ല. അതിനുള്ള പരിഹാരവുമായാണ്‌ ഗൂഗിള്‍ എത്തിയിരിക്കുന്നത്, അവരുടെ ആപ്ലിക്കേഷൻ ‘ഫൈൻഡ് മൈ ഡിവൈസ്’. ആൻഡ്രോയിഡ് ഫോണുകളില്‍ ഈ അപ്ലിക്കേഷൻ പ്രത്യേകമായി തന്നെ ഡൗണ്‍ലോഡ് ചെയ്യണം. ഐഫോണുകളില്‍ ഇൻ-ബില്‍ഡ് ആയിട്ടാണ് ഈ ഫീച്ചറുള്ളത്. ഒന്നിലധികം ആൻഡ്രോയിഡ് ഫോണുകള്‍ ഉപയോഗിക്കുന്നുണ്ടെങ്കില്‍ നഷ്ടപ്പെട്ട ഉപകരണങ്ങള്‍ കണ്ടെത്തുന്നതും നിയന്ത്രിക്കുന്നതും എളുപ്പമാകും. വീടിനുള്ളില്‍ തന്നെയാണ് ഫോണ്‍ വെച്ച മറന്നതെങ്കില്‍, കൈവശമുള്ള ഫോണ്‍ ഉപയോഗിച്ച്‌ ഒരു സൂചന ശബ്‌ദം പ്ലേ ചെയ്യാനും, ലോക്ക് ചെയ്‌ത് ഉപകരണം സുരക്ഷിതമാക്കാനും ഗൂഗിള്‍ മാപ്‌സ് ഉപയോഗിച്ച്‌ ഉപകരണത്തിലേക്കുള്ള ദിശാസൂചനകള്‍ നേടാനുള്ള ഓപ്‌ഷനുകള്‍ ലഭ്യമാണ്. ഫൈൻഡ് മൈ ഡിവൈസ് അപ്ലിക്കേഷൻ ഉപയോഗിക്കുന്നതിന് നിങ്ങളുടെ എല്ലാ ഉപകരണങ്ങളും ഒരേ ഗൂഗിള്‍ അക്കൗണ്ട് ഉപയോഗിച്ച്‌ ലോഗിൻ ചെയ്തിട്ടുണ്ടെന്ന് ഉറപ്പു വരുത്തണം. സ്‌മാര്‍ട്ട്‌ഫോണുകളോ ടാബ്‌ലെറ്റുകളോ മാത്രമല്ല, ഗൂഗിളിന്റെ വിയര്‍-ഒഎസില്‍ പ്രവര്‍ത്തിക്കുന്ന സ്മാര്‍ട്ട് വാച്ചുകള്‍ക്കും ഇത് പ്രായോഗികമാണ്.
മറ്റൊരു ആൻഡ്രോയിഡ് ഫോണ്‍ നിങ്ങളുടെ കൈവശമില്ലെങ്കില്‍ സുഹൃത്തിന്റെയോ കുടുംബാംഗത്തിന്റെയോ ഫോണ്‍ ഉപയോഗിച്ച്‌ നിങ്ങള്‍ക്ക് ജിമെയില്‍ അക്കൗണ്ടിലേക്ക് ലോഗിൻ ചെയ്യാവുന്നതാണ്, അല്ലെങ്കില്‍ ‘google.com/android/find/’ വഴി കമ്ബ്യൂട്ടറില്‍ ആക്‌സസ് ചെയ്യാവുന്നതാണ്.
ഫോണ്‍ സെറ്റിങ്സില്‍ ‘സെക്യൂരിറ്റി’ വിൻഡോയില്‍ ഫൈൻഡ് മൈ ഡിവൈസ്, വെബ്, ഗൂഗിള്‍ എന്നീ മൂന്ന് ഓപ്ഷനുകളിലൂടെയാണ് നിങ്ങള്‍ക്ക് എളുപ്പത്തില്‍ നിങ്ങളുടെ ഫോണ്‍ ലൊക്കേറ്റ് ചെയ്യാൻ കഴിയുക. ഈ വിൻഡോയില്‍ സ്വിച്ച്‌ അക്കൗണ്ട്സ് തിരഞ്ഞെടുത്ത്, ഗസ്റ്റ് മോഡില്‍ നഷ്ടമായ ഫോണിന്റെ ഗൂഗിള്‍ ഐഡി വെച്ച്‌ നിങ്ങള്‍ക്ക് ലോഗിൻ ചെയ്യാനും ഫോണ്‍ കണ്ടെത്താനും സാധിക്കും. ഇതിലൂടെ ഫോണ്‍ നിലവില്‍ ഉള്ള കൃത്യമായ സ്ഥലം ജിപിഎസിന്റെ അടിസ്ഥാനത്തില്‍ നിങ്ങള്‍ക്ക് കാണാൻ സാധിക്കും.
ഫൈൻഡ് മൈ ഡിവൈസ് ആപ്പിലൂടെ ഫോണ്‍ ഫാക്‌ടറി റീസെറ്റ് ചെയ്യാനും സാധിക്കും ഇതിലൂടെ നഷ്ടപ്പെട്ട ഫോണിലുള്ള സ്വകാര്യ ഫയലുകള്‍ മറ്റാര്‍ക്കും ആക്‌സസ് ചെയ്യാൻ കഴിയില്ലെന്ന് ഉറപ്പാക്കാനാകും. എന്നാല്‍, ഫോണ്‍ ഫാക്‌ടറി റീസെറ്റ് ചെയ്‌താല്‍, ഫൈൻഡ് മൈ ഡിവൈസ് ആപ്പ് വഴി നിങ്ങള്‍ക്ക് നഷ്ടപ്പെട്ട ഉപകരണത്തിന്റെ ലൊക്കേഷൻ ആക്‌സസ് ചെയ്യാൻ കഴിയില്ല.
