കണ്ണൂരിൽ പഞ്ചായത്ത് ഓഫീസില്‍ യുവാവിന്റെ അതിക്രമം; ജീവനക്കാരെ കയ്യേറ്റം ചെയ്ത യുവാവ് ഓഫീസിൻ്റെ ജനല്‍ച്ചില്ല് അടിച്ചുതകര്‍ത്തു

സ്വന്തം ലേഖിക

കണ്ണൂര്‍: ജീവനക്കാരുമായി വാക്കുതര്‍ക്കമുണ്ടായതോടെ കണ്ണൂരിലെ മാട്ടൂല്‍ പഞ്ചായത്ത് ഓഫീസില്‍ യുവാവിന്റെ അതിക്രമം.

മാട്ടൂല്‍ കാവിലെപറമ്പിലെ കെ.കെ.മുഫീദ് എന്ന യുവാവാണ് അതിക്രമം നടത്തിയത്. ജെസിബി ഡ്രൈവറായ ഇയാള്‍ ബില്ല് മാറാനായാണ് പഞ്ചായത്തില്‍ എത്തിയത്. തുടര്‍ന്ന് ജീവനക്കാരുമായി വാക്കുതര്‍ക്കത്തിലേര്‍പ്പെടുകയായിരുന്നു.

ഇതിനുപിന്നാലെ ജീവനക്കാരെ കയ്യേറ്റം ചെയ്യുകയും ജനല്‍ച്ചില്ല് തകര്‍ക്കുകയും ചെയ്തു. അതിക്രമം നടത്തിയ ശേഷം പൊലീസെത്തുന്നതിന് മുന്‍പ് ഇയാള്‍ രക്ഷപ്പെട്ടു. പഞ്ചായത്ത് അധികൃതരുടെ പരാതിയില്‍ മുഫീദിനായി പൊലീസ് അന്വേഷണം ആരംഭിച്ചു.