വാഗ്‌ദാനം ചെയ്‌തത് സ്വര്‍ണക്കട്ടികള്‍; നല്‍കിയത് ചെമ്പ്; ലക്ഷങ്ങള്‍ തട്ടിയെടുത്ത സംഘം പൊലീസ് പിടിയില്‍

സ്വന്തം ലേഖിക

മലപ്പുറം: സ്വര്‍ണക്കട്ടികള്‍ നല്‍കാമെന്ന് വാഗ്‌ദാനം ചെയ്ത് ലക്ഷങ്ങള്‍ തട്ടിയ സംഘം പിടിയില്‍.

മലപ്പുറം പൊന്നാനിയിലാണ് സംഭവം. ഗൂഡല്ലൂര്‍ സ്വദേശികളായ ഹമീദ്,​ അഷ്‌റഫ്,​ സൈതലവി എന്നിവരാണ് പിടിയിലായത്.

പാലക്കാട് സ്വദേശിയില്‍ നിന്നാണ് ഇവര്‍ ഏഴു ലക്ഷം തട്ടിയെടുത്തത്. മണ്ണ് കുഴിച്ച്‌ ജോലിയെടുക്കുമ്പോള്‍ സ്വര്‍ണക്കട്ടി ലഭിച്ചെന്ന് ഇത് നല്‍കാമെന്നും പറഞ്ഞാണ് തട്ടിപ്പ് നടത്തിയത്. സ്വര്‍ണക്കട്ടിയെന്ന് പറഞ്ഞ് 5000 രൂപ വിലവരുന്ന ചെമ്പായിരുന്നു പാലക്കാട് സ്വദേശിക്ക് സംഘം നല്‍കിയത്.

പിടിയിലായ ഹമീദ് നിരവധി കേസുകളിലെ പ്രതിയാണെന്ന് പൊന്നാനി പൊലീസ് അറിയിച്ചു. കൂടുതല്‍ പേര്‍ തട്ടിപ്പിന് ഇരയാക്കിയെന്നാണ് പൊലീസ് നല്‍കുന്ന സൂചന.