പണം ചോദിച്ചപ്പോൾ കാരണം പോലും പറയാതെ പുറത്താക്കി; ലഭിക്കാനുള്ളത് നാല് ലക്ഷത്തോളം രൂപ; വെളിപ്പെടുത്തലുമായി സൂര്യ ടിവിയിൽ സംപ്രേക്ഷണം ചെയ്തിരുന്ന “സുന്ദരി “സീരിയൽ നായിക അഞ്ജലി ശരത്

സ്വന്തം ലേഖകൻ
കൊച്ചി: പണം ചോദിച്ചപ്പോൾ കാരണം പോലും പറയാതെ പുറത്താക്കി. ലഭിക്കാനുള്ളത് നാല് ലക്ഷത്തോളം രൂപ. വെളിപ്പെടുത്തലുമായി സൂര്യ ടിവിയിൽ സംപ്രേക്ഷണം ചെയ്യുന്ന സുന്ദരി എന്ന സീരിയലിലെ നായിക അഞ്ജലി ശരത്. സീമ ജി നായർ അടക്കമുള്ള മുൻനിര സീരിയൽ താരങ്ങൾ അണിനിരക്കുന്ന സീരിയലിൽ ടൈറ്റിൽ റോളിൽ തന്നെയാണ് അഞ്ജലി അഭിനയിച്ചിരുന്നത്.

സീരിയലിൽ നായിക മാറിയത് എന്താണെന്ന സംശയം പലരും പ്രകടിപ്പിച്ചിരുന്നു. ഇപ്പോൾ ഇതാ അതിന്റെ കാരണം സുന്ദരിയായി എത്തിയ അഞ്ജലി തന്നെ തന്റെ ഇൻസ്റ്റഗ്രാമിൽ പോസ്റ്റ് ചെയ്ത കുറിപ്പിലൂടെ ‌ കാരണം വ്യക്തമാക്കിയിരിക്കുകയാണ്.

‘സുന്ദരിയിൽ നിന്ന് ഞാൻ എന്തുകൊണ്ട് പിന്മാറി എന്ന് പലരും ചോദിക്കുന്നുണ്ട്. ഞാൻ പിന്മാറിയതല്ല, എന്നെ പുറത്താക്കിയതാണ്. ഒരു കാരണം പോലും പറയാതെയാണ് എന്നെ ടെർമിനേറ്റ് ചെയ്തത്. ഇതുവരെ ചാനലിൽ നിന്നോ സീരിയൽ അണിയറ പ്രവർത്തകരിൽ നിന്നോ എനിക്കൊരു വിശദീകരണം ലഭിച്ചിട്ടില്ല.

കല്യാണത്തിനും, അത് കഴിഞ്ഞുള്ള റിസപ്ഷനും ഒക്കെ വേണ്ടിയാണ് ഞാൻ പത്ത് ദിവസത്തെ അവധി എടുത്തത്. എന്നാൽ അവധി ദിവസം കഴിഞ്ഞ് പത്ത് പതിനഞ്ച് ദിവസമായിട്ടും എന്നെ തിരികെ വിളിച്ചില്ല. എനിക്ക് പകരം മറ്റൊരു നടിയും സീരിയലിലേക്ക് പ്രവേശിച്ചു കഴിഞ്ഞു.

സീരിയലിലേക്ക് പുതിയതായി കടക്കുന്നവർ എല്ലാം നേരിടുന്ന പ്രശ്‌നമാണ്. ഒരു കാര്യങ്ങളും നമ്മളോട് തുറന്ന് സംസാരിക്കില്ല. പഴയ നിർമാതാവ് മാറി, പുതിയ നിർമാതാവ് സീരിയൽ ഏറ്റെടുക്കുമ്പോൾ, ആദ്യത്തെ നിർമാതാവ് വച്ച പെന്റിങ് എല്ലാം ക്ലിയർ ചെയ്യണം. അത് ചെയ്തിട്ടില്ല. മാത്രവുമല്ല, അങ്ങനെ പെന്റിങ് സാലറിയുള്ളവരുടെ ലിസ്റ്റിൽ എന്റെ പേരും ഇല്ല. ജോലി ചെയ്താൽ കൂലി കിട്ടണം. ഈ ചതിയ്ക്ക് നീതി കിട്ടുന്നവരെ പോരാടും’.

നാല് മാസം കാലം വളരെ ആത്മാർത്ഥമായിട്ടാണ് ഞാൻ ചാനലിനൊപ്പം നിന്നത്. ഈ നാല് മാസത്തെ പ്രതിഫലം രണ്ട് ലക്ഷത്തിന് മേലെയുണ്ട്. എനിക്ക് അത് നൽകാതെയാണ് പുറത്താക്കിയത്. സീരിയലിൽ നിന്ന് പുറത്താക്കിയത് മനസ്സിലാക്കാം, പക്ഷെ പ്രതിഫലം നൽകാതെ പുറത്താക്കിയത് ശരിയായില്ല. കടം വാങ്ങിയതോ, പിടിച്ചു പറിച്ചതോ ഒന്നുമല്ല ചോദിയ്ക്കുന്നത്. നാല് മാസം ഞാൻ കഷ്ടപ്പെട്ടതിന്റെ കൂലിയാണ്.അത് ലഭിക്കുകതന്നെ വേണമെന്നും താരം കൂട്ടിച്ചേർത്തു.