ഏറ്റുമാനൂരിൽ ബൈക്കപകടം രണ്ട് പേർ മരിച്ചു; മരിച്ചത് നിരവധി ക്രിമിനൽ കേസിലെ പ്രതി പൾസർ കണ്ണൻ; ഒപ്പമുണ്ടായിരുന്ന സ്ത്രീയെ തിരിച്ചറിഞ്ഞിട്ടില്ല; അപകടത്തിന്റെ സി.സി.ടി.വി ദൃശ്യങ്ങൾ തേർഡ് ഐ ന്യൂസിന്

സ്വന്തം ലേഖകൻ

ഏറ്റുമാനൂർ; പാലാ റോഡിൽ ബൈക്കുകൾ കൂട്ടിയിടിച്ച് ലോറിക്കടിയിലേക്ക് മറിഞ്ഞ് സ്ത്രീയ്ക്കും പുരുഷനും ദാരുണാന്ത്യം. പുരുഷന്റെ തലയുടെ ഒരു ഭാഗം പൂർണമായും തകർന്നു. രണ്ടു പേരുടെയും മൃതദേഹം മെഡിക്കൽ കോളേജ് ആശുപത്രി മോർച്ചറിയിൽ.

അപകടത്തിൽ മരിച്ചത് നിരവധി ക്രിമിനൽക്കേസുകളിൽ പ്രതിയായ പൾസർ കണ്ണൻ.ഒപ്പം ബൈക്കിലുണ്ടായിരുന്നത് അമ്മയുടെ ബന്ധുവെന്നു സൂചന.

ഏറ്റുമാനൂർ – പാലാ റോഡിൽ കിസ്മത്ത് പടിയിൽ ഇന്ത്യൻ ഓയിൽ പമ്പിന് മുൻവശത്താണ് അപകടം ഉണ്ടായത്. ഏറ്റുമാനൂർ ഭാഗത്തു നിന്നും എത്തിയ ബൈക്ക് നിയന്ത്രണം വിട്ട് മറ്റൊരു ബൈക്കിൽ ഇടിക്കുകയായിരുന്നു. ചൊവ്വാഴ്ച വൈകിട്ട് ആറരയോടെയായിരുന്നു അപകടം.

ഇടിയുടെ ആഘാതത്തിൽ ബൈക്ക് നിയന്ത്രണം വിട്ട് എതിരെ വന്ന ലോറിക്കടിയിലേക്ക് വീഴുകയായിരുന്നു. കനത്ത മഴയിൽ ബൈക്കിന്റെ നിയന്ത്രണം നഷ്ടമായതാണ് അപകടകാരണമെന്നു സംശയിക്കുന്നു.

ഓടിക്കൂടിയ നാട്ടുകാർ ചേർന്ന് രണ്ടു പേരെയും ഇതുവഴി എത്തിയ വാഹനത്തിൽ മെഡിക്കൽ കോളേജ് ആശുപത്രിയിലേയ്ക്കു മാറ്റി.

മെഡിക്കൽ കോളേജ് ആശുപത്രിയിൽ എത്തിയപ്പോഴേയ്ക്കും പൾസർ കണ്ണൻ മരിച്ചിരുന്നു. അൽപ സമയത്തിന് ശേഷം ഒപ്പമുണ്ടായിരുന്ന സ്ത്രീയും മരിച്ചു.