ടെക്സസ് സ്കൂളിൽ വെടിവയ്പ്പ്: 18 കുട്ടികൾ മരിച്ചു; അ‌ക്രമിയെ വെടിവച്ചുകൊന്നു

സ്വന്തം ലേഖിക

അ‌മേരിക്ക: അമേരിക്കയിലെ ടെക്‌സസിൽ സ്‌കൂളിൽ വെടിവയ്പ്പ്. 18 കുട്ടികളാണ് ആക്രമണത്തിൽ മരിച്ചത്. ഒരു അധ്യാപികയും രണ്ട് സ്‌കൂൾ ജീവനക്കാരും അക്രമത്തിൽ കൊല്ലപ്പെട്ടു. നിരവധി പേർക്ക് ഗുരുതര പരുക്കുണ്ട്. 18 വയസുകാരനാണ് ആക്രമണത്തിന് പിന്നിൽ. ഇയാൾ പൊലീസ് വെടിവയ്പ്പിൽ കൊല്ലപ്പെട്ടതായി റിപ്പോർട്ടുകളുണ്ട്. വെടിവയ്പ്പിന് പിന്നി​ലെ ഉദ്ദേശം എന്തായിരുന്നു എന്നതിനെക്കുറിച്ച് പൊലീസിന് വ്യക്തമായ സൂചന ലഭിച്ചിട്ടില്ല.

ഉവാൾഡെയിലെ റോബ് എലമെന്ററി സ്‌കൂളിലാണ് അപകടമുണ്ടായത്. 600ഓളം വിദ്യാർത്ഥികളാണ് ഇവിടെ പഠിക്കുന്നത്. ഉവാൾഡെ സ്വദേശി സാൽവഡോർ റാമോസാണ് വെടിവെയ്പ് നടത്തിയതെന്നാണ് റിപ്പോർട്ട്. വെടിവയ്പിൽ പരുക്കേറ്റവരെ പ്രദേശത്തെ രണ്ട് ആശുപത്രികളിൽ പ്രവേശിപ്പിച്ചു. രണ്ട് കുട്ടികളെ ചികിത്സയ്ക്കായി സാൻ അന്റോണിയോയിലേക്ക് മാറ്റി.അതേസമയം വെടിവയ്പുണ്ടായതിനെത്തുടർന്ന് പ്രദേശത്തെ എല്ലാ കാമ്പസുകളും പൂട്ടിയിരിക്കുകയാണ്.

അമേരിക്കൻ വൈസ് പ്രസിഡന്റ് കമല ഹാരിസ് വെടിവയ്പ്പിനെ ശക്തമായി അപലപിച്ച് രംഗത്തെത്തി. സംഭവം ഹൃദയഭേദകമാണെന്നും ഇനി ഇത്തരം സംഭവങ്ങൾ ആവർത്തിക്കാതിരിക്കാൻ ഇതിന് പിന്നിൽ പ്രവർത്തിച്ചവരെ കണ്ടെത്തി ശക്തമായ നടപടി സ്വീകരിക്കുമെന്നും കമല ഹാരിസ് പറഞ്ഞു. ഉവാൾഡെയിലെ മനുഷ്യരുടെ വേദനയ്‌ക്കൊപ്പമാണ് വൈറ്റ് ഹൗസെന്നും അവർക്ക് നീതി ഉറപ്പാക്കുമെന്നും കമലാ ഹാരിസ് കൂട്ടിച്ചേർത്തു.