മലപ്പുറം കരിപ്പൂരില് യുവാവ് മരിച്ചത് സൂര്യാഘാതമേറ്റെന്ന് പോസ്റ്റ്മോര്ട്ടം റിപ്പോര്ട്ട്. കരിപ്പൂര് പുളിയംപറമ്പ് സ്വദേശി സൈനുല് ആബിദാണ് മരിച്ചത്. ഇന്ന് രാവിലെയോടെയാണ് സൈനുൽ കുഴഞ്ഞു വീണത്. പിന്നാലെ സൈനുല് ആബിദിനെ കോഴിക്കോട് മെഡിക്കല് കോളജ് ആശുപത്രിയില് എത്തിച്ചെങ്കിലും രക്ഷിക്കാനായില്ല. സംസ്ഥാനത്ത് കടുത്ത ചൂട് തുടരുന്നതിനിടെയാണ് വീണ്ടും സൂര്യാഘാതമേറ്റുള്ള മരണം റിപ്പോർട്ട് ചെയ്തത്.
അതിനിടെ, കണ്ണൂരില് മാധ്യമപ്രവര്ത്തകന് സൂര്യാതപമേറ്റു. പ്രാദേശിക മാധ്യമപ്രവര്ത്തകന് ഷാജി കീഴറക്കാണ് സൂര്യാതപമേറ്റത്. ഇന്നലെ ഉച്ചക്ക് ചെറുകുന്ന് കീഴറയില് വീട്ടുമുറ്റത്ത് വെച്ചാണ് പൊള്ളലേറ്റത്. പ്രാഥമിക ആരോഗ്യ കേന്ദ്രത്തില് ചികിത്സ തേടി. ധര്മ്മശാലയിലെ സീല് ടിവിയില് ക്യാമറമാനാണ് ഷാജി. കാസര്കോട് തൃക്കരിപ്പൂരില് എട്ട് വയസുകാരനും സൂര്യാതപമേറ്റു. വിദ്യാര്ത്ഥിയായ ഇഷാനാണ് കഴുത്തിന് പൊള്ളലേറ്റത്. വീടിന് സമീപത്തെ ക്ഷേത്രോത്സവത്തിനിടെ ആണ് സൂര്യാതപമേറ്റത്.
