വീടിനുള്ളിലിരുന്ന വാഷിംഗ് മെഷീന്‍ പൊട്ടിത്തെറിച്ച് അപകടം ; വീടിന്‍റെ ഭാഗത്തു നിന്നും വലിയ അളവില്‍ പുക ; നാട്ടുകാരുടെ ഇടപെടൽ വന്‍ ദുരന്തം ഒഴിവായി

സ്വന്തം ലേഖകൻ

തിരുവനന്തപുരം: വീടിനുള്ളിലിരുന്ന വാഷിംഗ് മെഷീന്‍ പൊട്ടിത്തെറിച്ച് അപകടം. വെങ്ങാനൂര്‍ നെല്ലിവിളയില്‍ ബുധനാഴ്ച പകലാണ് സംഭവം നടന്നത്. നെല്ലിവിള സ്വദേശിയായ പ്രദീപിന്‍റെ വീട്ടിലെ വാഷിംഗ് മെഷീനാണ് പൊട്ടിത്തെറിച്ചത്.

സംഭവം നടക്കുമ്പോള്‍ പ്രദീപും കുടുംബവും പുറത്ത് പോയിരിക്കുകയായിരുന്നു. അതിനാൽ വന്‍ ദുരന്തം ഒഴിവായി. വീടിന്‍റെ ഭാഗത്തു നിന്നും വലിയ അളവില്‍ പുക ഉയരുന്നതു ശ്രദ്ധയില്‍പെട്ട നാട്ടുകാര്‍ ഫയര്‍ഫോഴ്‌സിനെ വിവരമറിയിക്കുകയായിരുന്നു.

എന്നാൽ ഉദ്യോഗസ്ഥര്‍ എത്തുന്നതിനുള്ളില്‍ തന്നെ പ്രദേശവാസികള്‍ ചേര്‍ന്ന് തീ അണച്ചു. വാഷിംഗ് മെഷീന്‍ ഓണ്‍ ചെയ്തിട്ടാണ് ഇവർ പുറത്തേക്ക് പോയതെന്നാണ് സൂചന. ഷോര്‍ട്ട് സര്‍ക്യൂട്ടാണ് അപകട കാരണമെന്ന് ഫയര്‍ഫോഴ്‌സ് ഉദ്യോഗസ്ഥര്‍ അറിയിച്ചു.