വാഹന പരിശോധനയ്ക്കിടെ വനിതാ എസ് ഐയെ കടന്നു പിടിച്ചു; യുവാവിനെ സാഹസികമായി പിടികൂടി വനിതാ എസ് ഐ
സ്വന്തം ലേഖിക
കോഴിക്കോട്: വാഹന പരിശോധനയ്ക്കിടെ ബൈക്കിലെത്തി വനിതാ എസ്‌ഐയെ കടന്നു പിടിച്ച യുവാവിനെ സാഹസികമായി പിടികൂടി.
വനിതാ എസ്‌ഐ തന്നെയാണ് ഇയാളെ ജീപ്പില്‍ പിന്തുടര്‍ന്ന് പിടികൂടിയത്. പുവാട്ടുപറമ്പ് പുറക്കാട്ടുകാവ് മീത്തല്‍ ഷെറിലിനെയാണ് (35) കോഴിക്കോട് മെഡിക്കല്‍ കോളേജ് പൊലീസ് അറസ്റ്റ് ചെയ്തത്.
Whatsapp Group 1 | Whatsapp Group 2 |Telegram Group
വ്യാഴാഴ്ച രാത്രി എട്ടുമണിയോടെ മാവൂര്‍ റോഡില്‍ വെള്ളിപറമ്പ് ആറാം മൈലിനു സമീപമായിരുന്നു കേസിന് ആസ്പദമായ സംഭവം നടക്കുന്നത്.
വാഹനപരിശോധന നടത്താനായി റോഡരികില്‍ കാത്ത് നിന്ന വനിതാ എസ്‌ഐയെ ഷെറില്‍ കടന്നുപിടിച്ചു.
റോഡില്‍ പൊലീസ് സംഘം നില്‍ക്കുന്നത് കണ്ട യുവാവ് ബൈക്ക് പതുക്കെ ഓടിച്ച്‌ വനിതാ എസ്‌ഐയുടെ സമീപത്ത് എത്തി കടന്നുപിടിക്കുകയുമായിരുന്നു. തുടര്‍ന്ന് ബൈക്കില്‍ രക്ഷപ്പെടാന്‍ ശ്രമിച്ചെങ്കിലും വനിത എസ്‌ഐ ഉടന്‍തന്നെ ജീപ്പില്‍ പിന്തുടര്‍ന്ന് ഒരു കിലോമീറ്ററിനപ്പുറം വെച്ച്‌ ഷെറിലിനെ പിടികൂടി.
ബൈക്കിന് കുറുകെ പൊലീസ് ജീപ്പ് നിര്‍ത്തിയാണ് ഷെറിലിനെ പിടികൂടിയത്. മെഡിക്കല്‍ കോളേജ് പൊലീസ് സ്റ്റേഷനിലെത്തിച്ച ഇയാളെ
മെഡിക്കല്‍ കോളേ ജ് സിഐ എം.എല്‍. ബെന്നി ലാലുവിന്റെ നേതൃത്വത്തില്‍ ചോദ്യം ചെയ്തു.
ഷെറില്‍ മുൻപ് അബ്കാരി കേസില്‍ പ്രതിയായിരുന്നെന്ന് പൊലീസ് പറഞ്ഞു. കോടതിയില്‍ ഹാജരാക്കിയ ഷെറിലിനെ റിമാന്‍ഡ് ചെയ്തു.
