പാലക്കാട്: കഴിഞ്ഞ നിയമസഭാ തിരഞ്ഞെടുപ്പില് എല്.ഡി.എഫിനുണ്ടായ കനത്ത തോല്വിക്ക് കാരണം സി.പി.എമ്മിന്റെ നിലപാടുകളാണെന്ന് രൂക്ഷവിമര്ശനവുമായി ഡി.വൈ.എഫ്.ഐ.
തിരഞ്ഞെടുപ്പ് പ്രചാരണ വേളയില് പിണറായി വിജയന് നടത്തിയ ചില പരാമര്ശങ്ങള് വോട്ടര്മാര്ക്കിടയില് വലിയ ദോഷം ചെയ്തുവെന്നും ഡി.വൈ.എഫ്.ഐ. പാലക്കാട് ജില്ലാ സമ്മേളനത്തിന്റെ പൊതുചര്ച്ചയില് വിമര്ശനമുയര്ന്നു. പാര്ട്ടിയുടെയും സര്ക്കാരിന്റെയും ശൈലിയില് മാറ്റം വരുത്താതെ മുന്നോട്ട് പോകാനാകില്ലെന്നാണ് യുവജന സംഘടനയുടെ വിലയിരുത്തല്.
പാര്ട്ടി നേതാക്കളുടെ ബന്ധുക്കളെയും മക്കളെയും സ്ഥിരമായി സ്ഥാനാര്ത്ഥികളാക്കുന്ന പ്രവണത പൂര്ണ്ണമായും അവസാനിപ്പിക്കണമെന്നും യോഗത്തില് കടുത്ത ആവശ്യമുയര്ന്നു. തിരഞ്ഞെടുപ്പില് യുവാക്കള്ക്ക് അര്ഹമായ പ്രാതിനിധ്യം നല്കാന് എല്.ഡി.എഫ്. തയ്യാറാകാത്തതിനെതിരെ വലിയ അമര്ഷമാണ് ഡി.വൈ.എഫ്.ഐ. യോഗത്തില് ഉയര്ന്നത്. വിരുദ്ധചേരിയിലുള്ള യു.ഡി.എഫ്. യുവാക്കള്ക്ക് നല്കുന്ന പ്രാതിനിധ്യം പോലും ഇടതുമുന്നണിയില് ലഭിക്കുന്നില്ല.
പുതുതലമുറയെ ആകര്ഷിക്കുന്നതില് പാര്ട്ടി പരാജയപ്പെടുകയാണെന്നും പരമ്പരാഗത വോട്ടുബാങ്കുകളില് പോലും വിള്ളലുണ്ടായതായും നേതാക്കള് ചൂണ്ടിക്കാട്ടി. പുതിയ വോട്ടര്മാരുടെ ചിന്താഗതികള്ക്കൊപ്പം സഞ്ചരിക്കാന് പാര്ട്ടിക്ക് സാധിക്കുന്നില്ലെന്നത് ഗൗരവമായി കാണണം. തിരഞ്ഞെടുപ്പ് കാലത്ത് രാഷ്ട്രീയ വിഷയങ്ങള് ചര്ച്ച ചെയ്യുന്നതിന് പകരം വ്യക്തിപരമായ പരാമര്ശങ്ങളിലേക്കും വിവാദങ്ങളിലേക്കും പ്രചാരണം വഴിമാറിയത് തിരിച്ചടിയായി.
Whatsapp Group 1 | Whatsapp Group 2 |Telegram Group
പിണറായി വിജയന്റെ പല പ്രസ്താവനകളും ജനങ്ങളില് അകല്ച്ചയുണ്ടാക്കാന് കാരണമായി. ജനകീയ പ്രശ്നങ്ങളില് നിന്നും പാര്ട്ടിയും സര്ക്കാരും അകന്നുപോകുന്നു എന്ന തോന്നല് പൊതുസമൂഹത്തില് ശക്തമാണ്. ഇത് തിരുത്താന് പാര്ട്ടി നേതൃത്വം അടിയന്തരമായി ഇടപെടണമെന്നും ഡി.വൈ.എഫ്.ഐ. ആവശ്യപ്പെട്ടു. തോല്വിയെക്കുറിച്ച് കേവലം ഉപരിപ്ലവമായ വിലയിരുത്തലുകള് നടത്തിയാല് പോരാ താഴെത്തട്ടില് തിരുത്തല് നടപടികള് വേണമെന്നുമാണ് ഉയര്ന്നുവന്ന പൊതുവികാരം. സഹകരണ ബാങ്ക് വിവാദങ്ങളും ഭരണവിരുദ്ധ വികാരവും വോട്ടെടുപ്പില് പ്രതിഫലിച്ചു.
മട്ടന്നൂരില് വി.കെ. സനോജിന്റെ ഭൂരിപക്ഷം കുറഞ്ഞത് നേതൃത്വം ഗൗരവമായി പരിശോധിക്കണമെന്ന് സമ്മേളനത്തില് ആവശ്യമുയര്ന്നു. പാലക്കാട് ജില്ലയില് സിപിഎം നേതാവായ സുരേഷ് ബാബുവിനെപ്പോലെയുള്ളവര് ഡിവൈഎഫ്ഐയെ സ്വന്തം കൈപ്പിടിയിലൊതുക്കാന് ശ്രമിക്കുകയാണെന്നും ഇത് സംഘടനയുടെ സ്വതന്ത്രമായ പ്രവര്ത്തനത്തെ ബാധിക്കുന്നുവെന്നും വിമര്ശനമുണ്ട്.
ഡിവൈഎഫ്ഐ സിപിഎമ്മിന്റെ ഒരു ‘ബി-ടീം’ മാത്രമായി മാറിക്കൊണ്ടിരിക്കുകയാണെന്ന ഗുരുതരമായ ആരോപണവും ചര്ച്ചയില് ഉയര്ന്നുവന്നു. സ്വതന്ത്രമായ നിലപാടുകളോ പ്രവര്ത്തനങ്ങളോ ഇല്ലാതെ സംഘടനയുടെ പ്രവര്ത്തനങ്ങള് ജില്ലയില് നിര്ജീവമായിരിക്കുകയാണ്. രാഷ്ട്രീയമായ പോരാട്ടങ്ങള്ക്കു പകരം സേവന പ്രവര്ത്തനങ്ങളില് മാത്രം ഒതുങ്ങുന്ന രീതി ഡിവൈഎഫ്ഐയുടെ സ്വാഭാവികമായ കരുത്തിന് തിരിച്ചടിയായെന്നും ചര്ച്ചയില് അഭിപ്രായമുയര്ന്നു.
